Deputeti i Grupit Parlamentar Demokrat, Halit Valteri ka ironizuar aksionin e Operacionit Forca e Ligjit. Në seancën e sotme plenare ku u diskutua dhe u votua për pakten AntiKÇK, Valteri u shpreh se aksioni i OFL-së nuk e ka goditur krimin, por është më shumë një shfaqje përpara kamerave.
Tradhtuat babagjyshët e krimit, iu drejtua Valteri deputetëve të mazhorancës, por deri vitin tjetër, kur t’ju duhen prap për zgjedhje “çunat problematikë”.
“Qytetarët janë të bindur se ju nuk i keni duart akullore, prandaj ju mungon vullneti politik për të arrestuar familjarët tuaj. Qytetarët ju njohin mirë kush jeni, siç njohin mirë emrat e kriminelëve. Ju keni një të mirë si hajdutë, vidhni dhe nuk dini ta fshihni plaçkën sepse nuk i trembeni ligjit. Ditën që do të arrestohet njëri prej jush, ditën që do të shembet miti juaj i pandëshkueshmërisë, atëherë njerëzit do të binden se ‘trima’ në këtë vend të bekuar nga Zoti nuk ka patur, por disa të marrë guxuan të kthehen në miliarderë me vila nga 2 milionë euro me rroga nëpunësish shteti”, u shpreh ndër të tjera deputeti Valteri nga foltorja e Kuvendit.
