Numri i emigrantëve që vdiqën mëngjesin e sotëm në Cutro, në rajonin jugor të Kalabrisë ka shkuar në 58 pasi anija me të cilin po udhëtonin drejt Italisë u nda në dysh.
Mediat italiane raportojnë se në anije ndodheshin rreth 150 emigrantë.
Sipas raportimeve, rreth 20 fëmijë mund të ketë vdekur.
Mes viktimave ka edhe dy binjakë të vegjël dhe një foshnje disa muajsh. Deri më tani, janë shpëtuar 80 emigrantë.
20 prej tyre janë transportuar në urgjencën e spitalit Crotone, por nuk janë në gjendje kritike. 59 të mbijetuarit e tjerë tashmë janë transferuar në Isola Capo Rizzuto, ku iu është dhënë ndihma e nevojshme.
Policia e Crotone ka vënë në pranga një person pasi dyshohet të ketë qenë një nga kontrabandistët e anijes së mbytur gjatë natës.
Bëhet fjalë për një shtetas turk. Anija ishte nisur katër ditë më parë nga porti i Izmirit, në të cilën po udhëtonin emigrantët që vinin nga Irani, Afganistani dhe Pakistani.
