Gjykata e Apelit rrëzoi dje vendimin e Gjykatës së Shkallës së Parë të marrë nga gjyqtari Agron Zhukri, që njihte Sali Berishën si kryetar të PD-së.
Përfundimisht vula dhe logo e PD-së mbeti në duart e Enkelejd Alibeajt. Çështja rikthehet në Gjykatën e Shkallës së Parë ndërsa në zgjedhjet lokale Alibeaj do të dalë zyrtarisht me kandidatët e tij.
Pas tre orësh, gjyqtarët e Gjykatës së Apelit dhanë vendimin në favor të Enkelejd Alibeajt. Vula dhe logo e shumë debtuar mbetet sërish në dorën e “mashës” së Lulzim Bashës, Enkelejd Alibeajt.
Gjykata e Apelit me relatore Elona Mihali dhe anëtarë Astrit Kalaja dhe Irida Kacerja ka kthyer në gjykatën e Shkallës së Parë çështjen për vulën e Partisë Demokratike.
Sipas Apelit çështja do të kthehet për rigjykim në Shkallën e parë duke pranuar kështu ankimin e Enkelejd Alibeajt. E ndërsa gjykata e Shkallës së Parë e gjykon, Alibeaj do të regjistrojë Partinë Demokratike në Komisionin Qendror Zgjedhor për zgjedhjet lokale të 14 Majit. Avokatët e Alibeajt kanë dhënë të dy nga një prononcim për shtyp pas vendimit të shpallur nga Apeli.
Avokati i PD-së së Alibeaj, Indrit Sefa është shprehur se Apeli ka vendosur të pranojë ankimimin e Enkelejd Alibeajt, pra të zhbëhet vendimi i Zhukrit. Që do të thotë që çështja do të shkojë për rigjykim në Gjykatën e Shkallës së Parë Tiranë si dhe do të ketë një tjetër trup gjykuesish. Avokati tha se brenda këtyre ditëve Partia Demokratike e Alibeajt do të regjistrohet në Komisionin Qendror të Zgjedhjeve.
I pyetur nëse vendimi i Gjykatës së shkallës së parë mund të jetë i njëjtë me atë të Zhukrit, ai tha se nuk ka asnjë mundësi të jetë i njëjtë. “Sot (dje) gjykata vendosi rikthimin e cështjes në shkallën e parë, kërkesë e jona. Praktikisht u pranua ankimimi i Alibeaj kjo do të thotë që çështja do rikthehet në gjykatën e shkallës së parë dhe do ketë një tjetër trup gjykues.
Do regjistrohemi në Komisionin Qendror të Zgjedhjeve brenda këtyre ditëve”, tha ai. I pyetur se çfarë ndodh nëse merret i njëjti vendim sërish si Zhukri në të Shkallës së Parë, ai tha se: “Gjykata e Tiranës nuk ka asnjë mundësi të marrë të njëjtin vendim si Zhukri. PD ka organe legjitime të saj”.
