Kreu i Partisë Republikane, Fatmir Mediu zhvilloi sot një takim elektoral me banorët e Kamzës ku bëri thirrje për të mbështetur kandidatin e koalicionit “Bashkë Fitojmë”, Arjan Hoxha.
Mediu tha se më 14 maj po afrohet ora e shqiptarëve të cilët nuk e pranojmë poshtërimin e qeverisë. Ai tha se vota e PR-së do të shkojë për Arjan Hoxhën.
“Kjo është ora juaj, është ora e shqiptarëve, të cilët nuk pranojnë poshtërimin dhe përbuzjen, është ora jonë për t`u ngritur dhe për të luftuar të gjithë së bashku, për atë që kemi më të shenjtë, fëmijët tanë, prindërit tanë, familjen tonë, Shqipërinë.
Është momenti që të tregojmë që ne nuk mundet të shikohemi si njerëz të dorës së dytë. Prandaj kam bindjen që Arjani në krye të Bashkisë, nuk do të jetë sic e quajmë ne “qytetari i parë”, por do të jetë shërbëtori i parë i Kamzës, për t`i shërbyer nevojave dhe interesave tuaja”, tha Mediu.
Nga ana tjetër, Arjan Hoxha tha se më shumë se kushdo Kamza po e vuan përbuzjen e regjimit.
“Më shumë se Kamza nuk e vuan askush këtë regjim, këtë diskriminim, këtë trajtim të pabarabartë, si në shpërndarjen e parave të tërmetit, të përmbytjeve, në legalizime, në urbanizim, në infrastrukturë, në arsim, në shëndetësi, në cdo fushë të aktivitetit jetësor në këtë qytet”, u shpreh Hoxha.
