Një pacient i infektuar i cili kishte rezultuar me koronavirus ka treguar se si ishte infektuar ai dhe familja e tij.
Duke folur në një intervistë për RTV Dukagjini, pacienti ka theksuar se gjendet i shtruar në Klinikën Infektive të QKUK-së, ndërsa ka rrëfyer se ai bashkë me tre familjarët e tij janë të infektuar. “Ne jemi tre familjarë dhe po na thonë që të tre jemi të infektuar me koronavirus”, ka theksuar ai.
Ai ka theksuar se gjendja e tij dhe e bashkëshortes është e mirë. Gjendjen pak më të dobët e ka babai i tij.
“Baba me thanë e ka gjendjen pak më dobët, por edhe ai është mirë. Nuk kanë lënë me e pa. Unë jam me bashkëshorten me një dhomë te dy e jemi mirë. Me familjarët komunikojmë”, tha ai.
Sipas tij, familjen e tyre në Viti po e ndihmojnë të gjithë. Ai tha se as ai as bashkëshortja nuk kanë asnjë simptomë dhe se janë mirë. Pacienti ka treguar se babai i tij ishte sëmurë, kishte simptoma dhe e kishte dërguar fillimisht në Viti, pastaj në Gjilan dhe pastaj në Prishtinë.
Babi i tij kishte ardhur nga Italia. “Baba tha se nuk po e ndjente veten mirë, dhe e dërguam te mjeku dhe ndodhi kjo që ndodhi”, tha ai.
“Fillimisht bashkëshortja kishte qëndruar me babain, sepse unë kisha shkuar të pushoj. Kur u ktheva më thanë që duhet të shtrohem edhe unë në spital, dhe pastaj rezultuam që ishim të infketuar”, u shpreh ai.
