Këshilli i Ministrave ka miratuar sot shfuqizimin e Bordit të Transparencës për Kaburantet.
Ministrja e Financave dhe Ekonomisë, Delina Ibrahimaj tha se bordi është shfuqizuar për shkak se çmimet tashmë janë stabilizuar.
“Një tjetër vendim i rëndësishëm, me fillimin e krizës ngriti një bord të transparencës për kontrollin e çmimeve. Që prej asaj kohe çmimet kanë pasur luhatje të mëdha. Ne vendosëm të përcaktojmë disa marzhe fitimi me qëllim limitimin të efektit të spekulimeve të hidrokarbureve dhe të limitonim abuzimet. Ne vendosëm, për shfuqizimin e bordit të hidrokarbureve dhe situatës së veçantë në këtë treg”, tha Ibrahimaj.
Bordi i Transparencës për Karburantet u ngrit në muajin mars të vitit 2022, pas rritjes në nivele rekord të çmimit të karburanteve, kryesisht naftës. Qëllimi i Bordit ishte të mbante ekuivalent çmimin në raport me të dhënat e bursave ndërkombëtare.
Por, Bordi u përball me kritika pasi çmimi i naftës fillimisht pësoi një ulje rekord dhe më pas iu rikthye vlerave të larta, pavarësisht se në bursa, vlera ishte shumë herë më e ulët.
