Grupet kriminale serbe pas dhunës së ushtruar në Zveçan prej tensioneve të ashpra, kanë lënduar rëndë një efektiv të KFOR-it, duke e lënduar rëndë ku është dashur amputimi i gjymtyrës së njërës këmbë.
Ministri i Mbrojtjes së Kosovës, Armend Mehaj, ka shprehur keqardhje për ushtarin hungarez të cilit iu pre gjymtyra e poshtme këtë të hënë, pas lëndimit që mori nga ana e grupeve kriminale serbe në Zveçan.
Përmes një postimi në facebook, Mehaj, thekson se grupet kriminale që dhunuan ushtarët e KFOR-it në Zveçan duhet të marrin dënimin e merituar.
Ai shton se dhuna është e papranueshme dhe se askush formë nuk mund të zmbraps ushtrimin e rendit e ligjit në Kosovë.
“Shpreh keqardhjen time me rastin e pranimit të informacionit se ushtarit hungarez të KFOR-it, të lënduar nga ana e grupeve kriminale serbe gjatë protestave në Zveçan, për shkak të gjendjes së rënduar shëndetësore është dashur që t’i amputohet këmba nga ana e mjekëve të Institutit Kombëtar të Rehabilitimit Mjekësor në Hungari.
Uroj që 26 ushtarët tjerë hungarez të plagosur sa më parë të rikuperohen, e të vazhdojnë angazhimin e tyre në kuadër të misionit të KFOR-it.
Grupet kriminale përgjegjëse për sulmin ndaj pjesëtarëve të KFOR-it duhet të marrin dënimin meritor, ngase dhuna është e papranueshme dhe asnjë formë nuk mund të zmbraps ushtrimin e rendit e ligjit, mjeteve demokratike të pakontestueshme, të drejta e të domosdoshme për sigurinë e vendit dhe të qytetarëve të Republikës së Kosovës”, shkruan meja në facebook.
Më 29 maj, dhjetëra ushtarë hungarezë që ishin si pjesë e KFOR-it për mbarëvajtjen e sigurisë gjatë protestave të serbëve në Zveçan u plagosën pasi një grup serbësh i sulmuan me mjete shpërthyese.
Ministri i Mbrojtjes Kombëtare hungareze raportoi se 27 ushtarë hungarezë mbetën të plagosur gjatë përplasjes me agresorët serb. Shumica e gardistëve hungarezë tashmë kanë mundur të shkojnë në shtëpi, por gjendja e dy ushtarëve është ende e rëndë dhe ata janë ende duke u trajtuar në spital.
