Një nënë ka rrëfyer mëngjesin e sotëm historinë tragjike të të birit. Sipas rrëfimit të saj, djali ka rënë nga një ndërtesë trekatëshe në Gjermani ndërsa ishte duke punuar duke thyer legenin.
Nëna e tij thotë se ai është dërguar për operim në Itali, por me situatën e krijuar nga koronavirusi autoritetet spitalore i kanë kërkuar që të lirojë shtratin pasi do të përdoret për të infektuarit me koronavirus.
Gjithashtu kufijtë janë mbyllur ku shumë shqiptarë kanë mbetur jashtë vendit edhe pse duan të rikthehen në atdhe.
Nëna i bën thirrje mes lotësh kryeministrit dhe ministres së Shëndetësisë që ta ndihmojnë për t’i rikthyer djalin në Shqipëri pasi ajo vetë nuk mund ta ndjekë si rast sepse është invalide.
“Kam një hall të madh. Kam pasur djalin në Gjermani duke punuar me tre-mujor, dhe gjatë punës ka rënë nga një ndërtesë trekatëshe dhe ka thyer legenin.
Është në një spital në Itali. Është operuar po mjekët i kanë thënë atje që duhet të lirojë spitalin pasi do të shtrojnë të infektuarit me koronavirus. Unë i bëj thirrje z. kryeministër dhe ministres së Shëndetësisë të ma transferojnë djalin dhe të ma sjellin këtu.
Jam një nënë invalide nuk mundem ta ndjek, nuk kam ku të vete, nuk kam ku të shkoj”, rrëfeu nëna në emisionin e mëngjesit në News 24.
I kanë thënë që duhet të largohet me paratë e veta nga ai spital?
Po patjetër, hajdeni merreni kanë thënë ata. Kufijtë janë të mbyllur. Ai nuk lëviz fare. Ai është i shtrirë, është operuar dhe nuk lëviz fare nga krevati. Ne vetëm sa kemi folur në telefon.
