Nga Neda Balluku
Nga fëmijët me rroba plazhi në det tek shuma e parave qe mbajnë në portofol. Nga rrëza e bikinit të asaj mikeshës, tek çdo pjatë që ha në të tre vaktet çdo ditë të Zotit. Tashmë instagrami është kthyer në fiksim.
Dhe kush më shumë e kush më pak ëndërron e përpiqet të jetë influenceri i radhës. Nëse deri dje dikush përpiqej të rriste komunitetin e vet në instagram, e bënte sepse si qëllim kishte televizionin.
Sot “inovatorët dixhitalë”, bëjnë televizion që të ngrenë instagramin. Dhe kur kjo ndodh, atëherë duket se me rritjen e çdo followersi, zgjerohen dhe kufijtë e se çfarë mund të postohet online. Deri në çapëlyerjen e tyre!
Dje pashë në instagram një vajzë e cila tregonte eurot që kishte fituar por nuk specifikonte mënyrën. Gjithmonë më është dukur i rëndomtë dhe amoral ekspozimi i parasë. Megjithatë i rashë lapsit tim.
Ato parà nuk i kisha bërë dot as për një vit me punët që e tërë dynjaja e di që kam. Një tjetër postonte rrëzën e kofshës aty ku nis cepi i mbathjeve dhe jepte përshtypjen që do mjaftonte veç një fllad i lehtë deti për të zbuluar të imagjinueshmen. A di të më thotë dikush përse një vajzë e bën këtë?
Dikush tjetër, që thonë se me instagramin “bën shumë lekë” poston atë që ha çdo vakt, nga restorante të ndryshme ku mesa duket është i ftuar. Pjata të ndryshme, me ngjyra, me forma. Mendova sa mirë që këta të shtëpisë nuk kanë instagram për t’i ndjekur, se u qaj hallin që dje u duhej të përballeshin me kimën time modeste me vezë që gatova shpejt e shpejt për drekë.
Pastaj mbërrijmë tek këto që postojnë kalamajt me breçka deti, për të promovuar diçka cilado qoftë. Shkollën private të kalamajve për të promovuar mirëqenien e tyre. Dhe shtëpinë luksoze për t’i fshehur vetes të vërtetën ulëritëse të problemeve në çift.
Në fund. Një vajzë postonte një prezervativ. Në story. E kam seriozisht. E kishte në sirtar, i shkrepi foton me iphone dhe e postoi. Për të na treguar që ne jemi ajo që postojmë. Dhe se sidomos, për të na treguar që followersat sot kanë të drejtë të hynë, edhe aty ku hyn prezervativi.
