Reshjet e shiut me intensitet të lartë kanë vijuar në vend gjatë mbrëmjes dhe orëve të paradites së sotme.
Sipas Ministres së Infrastrukturës dhe Energjisë, Belinda Balluku, janë raportuar disa problematika, ndërkohë që të gjitha strukturat nën varësinë e kësaj ministrie ndodhen në terren ku po punohet, pavarësisht vështirësive të motit, për normalizimin e situatës në pikat ku janë evidentuar problematika.
“Aktualisht janë jashtë funksionit 16 fidera, duke sjellë ndërprerje të furnizimit me energji elektrike për afro 15 mijë abonentë. Në terren për normalizimin e situatës janë 1100 punonjës të OSSH. Në të gjitha linjat e transmetimit dhe nënstacionet e OST nuk ka pasur asnjë avari apo ndërprerje të energjisë. Në kaskadë ka pasur prurje të konsiderueshme, por të cilat janë të menaxhueshme”, shkruan Balluku në Facebook.
Përsa i përket akseve rrugore, sipas Ballukut, “në rajonin Verior ka pasur rënie gurësh e materialesh në disa zona të segmenteve Skuraj-Peshkopi, Hani i Hotit-Tamarë, Bogë- Theth, Kukës- Shishtavec, Vau Dejës- Pukë, Bajram Curri- Valbonë, Qafë Mali Fierzë Ura e Fanit- Kryqëzim Hadroj, Bujan – Qafë Morinë, është punuar gjatë gjithë natës dhe ditës së sotme dhe në këto segmente qarkullohet normalisht. Në rajonin Qendror problem është krijuar vetëm tek zona “Shkëmbi Kavajës” ku ka pasur prani uji në korsinë e djathtë. Qarkullimi vijon normalisht. Në aksin Elbasan- Qafë Thanë ka pasur rënie gurësh të cilat janë pastruar gjatë natës dhe qarkullimi tani vijon normalisht ashtu si dhe në rajonin Jugor, në aksin Përmet- Çarshovë. E njëjta situate edhe në zonat Zëmblak- Dogana Goricë, në zonën e Muzinës, Levan -Damës dhe Damës – Tepelenë. Korçë – Voskopojë, Berat- Çorovodë, Ura e Gjormit- Ura e Laskos, Podgorie – Liqenas, ku pas pastrimit të rrugëve qarkullimi kryhet pa problematika.
Përsa i përket furnizimit me ujë ku në disa zona u shfaqën probleme për shkak të ndërprejes së energjisë elektrike; në rajonin UK Elbasan, bashkia Peqin, për shkak të ndërprerjes së energjisë elektrike ka pasur stakim në stacionet e pompimit. Në rajonin UK Korçë, bashkia Maliq, u rikthye energjia elektrike dhe stacionet e pompimit janë në punë, në rajonin UK Gjirokastër, aktualisht shfaqen probleme furnizimi në fshatin Humelicë, Gjirokastër dhe fshatin Stegopul, Libohovë për shkak të dëmtimit të tubit të furnizimit për depot e këtyre dy fshatrave. Po ashtu në rajonin UK Pogradec, gjatë natës ka pasur ndërprerje të shërbimit në fshatin Gurras dhe Zervaskë, pasi po kryhen punime tek stacioni i pompimit Gurras.
Në rajonin UK Durrës dhe Lezhë, ka pasur reshje të dendura shiu duke ngarkuar infrastrukturën e kanalizimeve, por situata është kthyer në normalitet.
Në Portin e Durrësit nuk janë shfaqur problematika si dhe nuk ka pasur pezullim të operacioneve portuale. Tragetet janë akostuar në oraret e parashikuara. Edhe në Portin e Vlorës nuk janë raportuar problematika. Në aeroportin ndërkombëtar “Nënë Tereza” dhe aeroportin ndërkombëtar të Kukësit deri më tani nuk raportohen problematika /O.S
