Një prej kandidatëve më potencialë të Republikanëve, në zgjedhjet Presidenciale që do të mbahen në vitin 2024, është Donald Trump.
Pikëpyetjet që ngrihen shpesh kur emri i ish Presidentit lakohet si kandidat në zgjedhjet e ardhshme, lidhen me faktin se Trump po përballet me shumë akuza dhe gjyqe, të cilat pritet të mbahen vitin e ardhshme. Në total Trump po përballet me 91 akuza.
Ç’ndodh nëse Trump përfundon prapa hekurave përpara zgjedhjeve Presidenciale?
Kjo nuk do ta pengonte ish Presidentin të garojë, madje edhe të fitojë, duke qenë se ligji në SHBA nuk e pengon një të dënuar të jetë kandidat për President. Në një skenar të tillë, nëse Trump do të fitonte, ai mund të përdorë fuqinë për të falur veten, për dënimet federale. Megjithatë, ai nuk do të mund ta bënte këtë për dënime në dy shtete ku po përballet me akuza.
Ekipi ligjor i ish Presidentit po përpiqet t’i shtyjë proceset deri pas zgjedhjeve. Nëse Trump i fiton zgjedhjet, kjo do t’i ofronte atij imunitet për të paktën 4 vite, pasi një President në detyrë nuk mund të akuzohet, përveç rasteve kur e shkarkon Kongresi.
Zgjedhjet Presidenciale në SHBA pritet të jenë mjaft interesante edhe për këtë arsye, ndërkohë që kandidatët më potencialë në garë janë Joe Biden, Presidenti aktual, nga demokratët dhe Donald Trump nga republikanët.
Në kampin republikan përballë Trump garojnë, Haley, Ramaswamy, Hutchinson, Binlley, Scott, DeSantis, Christie, Burgum, por Trump është shumë më i favorizuar në sondazhe për të marrë nominimin nga partia.
Në kampin demokrat, emrat në garë janë Biden, Williamson, Uygur dhe Philips. Kandidati më potencial duket presidenti aktual Biden. Me shumë gjasa, do të kemi sërish një garë Biden-Trump!/e.t
