Krerët fetarë ortodoksë, myslimanë, bektashi, katolikë dhe protestantë shqiptarë i dhuruan Papa Françeskut një flamur shqiptar me mbishkrimin “Të gjithë vëllezër!”. Një mesazh ky që portretizon unitetin e komuniteteve fetare që jetojnë në harmoni në Shqipëri.
Krerët fetarë nga Shqipëria ishin të pranishëm në Sheshin e Shën Pjetrit, për të përshëndetur Papën dhe për të dëshmuar me përvojën e tyre personale, rëndësinë e bashkëjetesës ndërfetare.
Delegacioni shqiptar përbëhej nga Imzot Giovanni Peragine dhe don Ignazio Bonsignore, Atë Mihal Sanellari dhe Atë Vangjel Sotiri, pastorët Sean Mason dhe Elidon Lilo, myftiu Ledian Cikalleshi dhe z.Marenglen Ocka, Baba Sadik Ibrokodheli dhe Përparim Ibra.
Gjatë vizitës së tyre në Romë, krerët fetarë vizituan vende të ndryshme kulti, si kishën e Shën Teodorit, xhaminë e Romës dhe një qendër bektashinjsh në Capena, pranë kryeqytetit italian. Grupi bëri edhe një vizitë në Dikasterin vatikanas për dialogun ndërfetar./e.t
