Reshjet e shiut kanë përfshirë pjesën më të madhe të territorit këtë 28 Nëntor ndërsa në zonat e thella malore, si Bogë, Vermosh dhe Dardhë vijon rënia e borës. ARRSH njofton se po punohet për hapjen e rrugëve me borë pastruese dhe shpërndarje kripe.
Në akset nacionale autoritetet njoftojnë se qarkullimi vijon pa probleme.
Ende në disa zona të thella të Qarkut Dibër, problematikë mbetet mungesa e energjisë elektrike në disa fshatra. 6 grupe të OSHE janë në terren për riparimin e defekteve.
Tre banorë kanë rrezikuar të mbyten në ujërat e përroit Prodan – Gjonç të Korçës.
Ata po udhëtonin me një mjet fuoristradë, me të cilin kanë tentuar të kalojnë lumin. Për shkak të prurjeve të shumta të ujit, mjeti ka mbetur i bllokuar.
Banorët e fshatit kanë lajmëruar shërbimin zjarrfikës të bashkisë për t’u ardhur personave që udhëtonin me këtë mjet. Siç shihet dhe në pamje, mjeti zjarrfikës ka bërë të mundur nxjerrjen në breg të mjetit.
Sipas sinoptikanëve, të mërkurën nuk do të ketë reshje shiu ndërsa temperaturat do të rriten me disa gradë. Reshjet e shiut pritet të rikthehen ditën e shtunë./O.S
