Ndryshimet klimatike po bëhen më shqetësuese vitet e fundit në vendin tonë duke sjell dhe një rritje të kostove të demëve në infrastrukturë.
Një dokument i qeverisë vlerëson se vlera mesatare e dëmeve është 147 milionë Dollarë dhe këtu bëjnë pjesë përmbytjet, tërmetet apo rrëshqitjet që prekin rrjetin rrugor dhe urat. Sipas ekspertëve të Institutit të Gjeoshkencave vitit 2023 ka dëshmur një rritje të kushteve ekstreme të motit.
“Kemi vërejtur vitet e fundit ndryshime të klimës duke filluar që nga ndryshimi në sasinë e reshjeve, intensitetit të reshjeve, ndryshimi në vlerat ekstreme të temperaturave si ato maksimale dhe minimale. Jemi përballur gjatë vitit të fundit me stuhi të ndryshme. Rëshqitjet kanë qenë problematike gjatë vitit të fundit. Përmbytjet me të cilat jemi përballur pothuajse në të gjitha qarqet përkthehen në dëme ekonomike.”
Shqipëria vuan më shumë nga përmbytjet lumore, të cilat përbëjnë rreth 84% të dëmit vjetor në infrastrukturë.
“Problematika kryesore lidhur me përmbytjet vjen nga përmbytjet e lumenjve të mëdhenj siç është Vjosa që shkakton probleme me daljen e saj në qytetet e Fierit dhe Vlorës dhe gjithashtu përmendim Drinin pasi përmbytjet më të mëdha historike kanë ndodhur në qytetin e Shkodrës dhe pasojat më të mëdha i kanë vuajtur qytetarët e Shkodrës. Kryesisht Shkodra sepse preket edhe Lezha nga përmbytjet e Drinit. E gjithë infrastruktura që ndodhet përgjatë këtyre lumenjve është e rrezikuar, ashtu siç janë edhe bizneset edhe shtëpitë. Pra çdo gjë që ndodhet përbri lumenjve.”
Korridori 4 (Tiranë-Durrës) dhe Korridori 5 Durrës-Vlora, janë rrugët më kritike në vend dhe më të prekshme ndaj ngjarjeve të përmbytjeve, ndërkohë që shqetësim mbetet edhe rrëshqitja e dherave.
“Zonat të cilat janë përballur më shumë me rëshqitje janë zonat kryesisht në pjesët malore dhe kodrinore, pasi për shkak të intensitetit të shtuar në një hark kohor të shkurtër shkaktojnë këto rëshqitjet.”
Ndryshimet e klimës sipas ekspertëve veç dëmeve në infrastukturë shkaktojnë problematika të mëdha dhe në bujqësi. Ndaj rekomandohet që investimet të bëhen duke patur parasysh rritjen e qëndrueshmërisë ndaj klimës dhe fatkeqësitë natyrore./O.S
