Kompania prestigjioze “Johnson & Johnson”, ka bërë të ditur sot se në shtator do të nisë testimin tek njerëzit të vaksinës eksperimentale për koronavirusin, duke shtuar se kjo vaksinë do të jetë e disponueshme për përdorim emergjent të autorizuar në fillim të vitit 2021.
Ndërkohë, aksionet e kompanisë Johnson & Johnson u rritën paraprakisht me më shumë se 4 për qind. Kompania deklaroi se po rrit kapacitetin e saj prodhues me një laborator të ri në SHBA, si dhe po bën shtesa në pikat ekzistuese, për të prodhuar dhe shpërndarë sa më shpejt vaksinën e mundshme.
J&J, tha gjithashtu se ka kryer më shumë se 1 miliard dollarë investime, së bashku me Agjencinë Amerikane Biomjekësore për Kërkimet e Avancuara dhe Autoritetin e Zhvillimit, e cila është pjesë e Departamentit të Shëndetit dhe Shërbimeve Njerëzore, për të bashkëfinancuar studimin e vaksinës.
J&J, është kandidatja kryesore për të nxjerë vaksinën më të fuqishme në botë. Ajo do të futet në fazën 1 të studimit klinik tek njerëzit përgjatë shtatorit 2020, dhe të dhënat klinike mbi efektet e saj priten të shihen që para fundit të këtij viti.
Nëse gjërat do të shkojnë mirë, kompania tha se vaksina mund të jetë e disponueshme për përdorim urgjent në fillim të vitit 2021. “Bota po përballet me një krizë urgjente të shëndetit publik, dhe ne jemi të përkushtuar të bëjmë pjesën tonë për të prodhuar një vaksinë kundër COVID-19 të disponueshme dhe të përballueshme globalisht sa më shpejt të jetë e mundur”- tha Alex Gorsky, drejtor ekzekutiv i kompanisë Johnson & Johnson.
Kompania deklaroi gjithashtu se e nisi që në janar punën për zhvillimin e vaksinës COVID-19. J&J tha se pret ta zhvillojë këtë vaksinë për një kohë të shkurtër, jo siç zgjat zakonisht zhvillimi i një vaksine nga 5-7 vjet. Gjithnjë e më shumë po bëhen përpjekjet globale për të gjetur një vaksinë për koronavirusin, që ka marrë deri tani jetën e mbi 35.000 njerëzve në të gjithë botën.
Por ekspertët kanë paralajmëruar, se mund të duhet më shumë se një vit që të jetë gati një vaksinë për të. Një pacient u trajtua me vaksinën e Moderna –s, në një fazë të hershme të sëmundjes në fillim të këtij muaji, duke e bërë atë pretendentin kryesor në garë për të zhvilluar një vaksinë të efektshme.
S.T
