Ishte 18 vjeçe kur erdhi në Itali, por ajo ishte e vendosur për të ardhmen e saj. Ishte fundi i viteve ’90, kur Brunilda zbriti në Itali.
Ajo do të studionte mjekësi në shtetin fqinj, ku më pas do të mbronte edhe doktoraturën në pulmonologji.
Brunilda Marku është një pulmonologe e vlerësuar, e cila punon në departamentin në të cilin mbrojti doktoraturën në Ferrara të Italisë.
Në këto ditë të vështira që ka prodhuar koronavirusi, duke prekur pjesën më të madhe të Italisë, përfshirë edhe Ferraran, Shqipëria dërgoi në ndihmë të Italisë 20 mjekë dhe 10 infermierë.
“Ne jemi një popull që nuk i harrojmë të mirat që na ka bërë Italia” tha kryeministri Rama pak ditë më parë .
Të tridhjetë mjekët shqiptarë janë tashmë në Lombardi. Ata do të paguhen nga qeveria shqiptare, ndërsa do të punojnë në Brescia dhe Bergamo. “Unë jam shqiptare dhe italiane”, thotë Brunilda Marku.
Ajo shprehet se është “vërtet krenare për vendimin e Kryeministrit tonë. Italia është shtëpia jonë.”
Brunilda Marku punon në spitalin Sant’Anna. Ajo tregon se “Të moshuarit këtu vdesin, pasi ata janë kategoria më e rrezikuar nga koronavirusi dhe goditen nga pneumonia agresive”.
Marku thekson se nuk ka parë ndonjëherë një rast të tillë si me koronavirusin edhe pse ka pasur raste të pacientëve me pneumoni agresive dhe të rënduar.
“Në eksperiencën time pneumonia jep një goditje të madhe në rast të prekjes nga koronavirusi.” shprehet Marku, ndërsa shton se masat e marra nga qeveria italiane janë të justifikuara për të shmangur infektimin me Covid-19.
Ajo tregon edhe histori njerëzore që kanë tronditur Italinë dhe botën nga të prekurit nga koronavirusi.
“Ka histori të tilla, të njerëzve që kërkojnë informacione për të atin, nënën, prindërit që kërkojnë të dinë për fëmijët, po ashtu nipërit që duan të dinë për gjyshërit e tyre. Çdo histori na prek njësoj. Më kujtohet një rast kur një djalë i ri na telefonoi për gjyshin e tij. Ai kishte humbur prindërit. Dhe gjyshi ishte familja e tij tashmë. Për fat të keq, gjyshi nuk ia doli dot.”, përfundon mjekja shqiptare, Brundila Marku.
Përshtati nga Ruggeropo.it për Fjala.al, B. Quku
