Sekretari i OMONIA-s Marin Suli i ftuar në një studio televizive, tha se sasia dhe numri i madh i dokumenteve të falsifikuara i bën të jenë mosbesues në pavarësinë e gjykatës dhe krejt të bindur që Beleri do të dënohet me urdhër politik.
Duke vijuar më tej, Suli tha se Beleri dhe mbështetësit e tij duan që çështja të mbyllet sa më parë dhe që të vendosë Strasburgu si arbitër i paanshëm.
Po ashtu Suli sqaroi kërkesat që do të ngrihen në gjykatën e Strasburgut.
“Janë një sërë kërkesash. Është kërkesa lidhur me mbajtjen në mënyrë të padrejtë mbi bazën e dokumenteve tashmë të vërtetuara dhe në gjykatë të falsifikuara në paraburgim prej 9 muajsh i kryetarit të zgjedhur të bashkisë.
Mbajtja në mënyrë flagrante dhe moslejimi për 9 muaj rresht të mos bëjë betimin dhe të mbyllë procesin kushtetues të zgjedhjeve të 14 majit si dhe përdorimi nga instancat shtetërore i dokumenteve të falsifikuara për të montuar një çështje dhe shkeljet flagrante të të drejtave të njeriut të Belerit dhe popullit të Himarës.
Nuk është se presim që Belerin të mos e dënojnë, nuk duam të na sorollasin, ta mbarojnë çështjen një orë e më parë, të bëjnë çfarë kanë për të bërë që ne ta depozitojmë çështjen në Strasburg. Strasburgu si arbitër i paanshëm ta gjykojë çështjen.
Në gjykimin tonë është një çështje e montuar dhe pa fakte, s’ka korrupsion asgjë sepse në gjykatë është vërtetuar që Beleri ka qenë nga ana tjetër e qytetit ku është bërë skema e prezumuar e shkëmbimit të lekëve.
Ka lekë gjoja korrupsioni po shenjat e gishtave të Belerit dhe Kokaveshit nuk ekzistojnë.
Gjyqtari Kalaja thotë ta mbajmë në burg se është i dënuar me dëshmi penaliteti, ndërkohë që del që dëshmia e penalietit qenka e falsifikuar enkas për Belerin dhe ka ndodhur një herë në sistem.
Sasia dhe numri i madh i dokumenteve të falsifikuara na bën të jemi mosbesues në pavarësinë e gjykatës dhe krejt të bindur që Beleri do të dënohet me urdhër politik.”, tha Suli./e.t
