Kryeministri i Italisë, Giuseppe Conte ka prezantuar ‘Faza 2’ të menaxhimit të Covid-19 që do të jetë në dy hapa: e para ka të bëjë me hapjen e vogël për aktivitetet e prodhimit, ndërsa e dyta do të përfshinte një rimodulim të masave për lëvizjen dhe daljen e personave.
Pas takimit të zhvilluar mes kryeministrit Conte dhe teknikëve, u vendos që fazat e reja të fillojnë të zbatohen pas 13 prillit.
Në takimin e pasdites së djeshme midis Contes dhe ministrave e Komitetit Shkencor Teknik, u diskutuan të gjitha masat përfshirë ato të spitaleve Covid e deri te forcimi i shëndetit në të gjithë vendin.
”Në takim, u ra dakord të garantohen disa pika fikse se kur do të fillojnë rihapjet, duke filluar nga zbatimi rigoroz të distancimit. Sa i përket testeve sierologjike dhe tamponëve, do të nevojiten linja të qarta”,-njoftojnë burimet qeveritare, nga komiteti shkencor dhe teknik.
“Ne duhet të jemi shumë të kujdesshëm për fazën 2: nëse bëjmë një gabim, do të kthehemi në bllokim dhe do të rifillojmë nga e para”,-theksoi ministri i Jashtëm Luigi Di Maio në emisionin ”Porta a Porta”/Fjala.al/
