Një emigrant shqiptar i cili ka mbetur në kufirin e Kakavijës për shkak të masave të marra nga qeveria shqiptare si pasojë e situatës së krijuar nga koronavirusi, i ka bërë thirrje kryeministrit shqiptar Edi Ramës, që të hapë kufirin.
Emigranti nga qyteti i Beratit i quajtur Isa Gushtani thotë se është i izoluar bashkë me 10 shqiptarë të tjerë në zonën neutrale të Kakavijës.
Ai shprehet se shteti shqiptar po i trajton si kafshë qytetarët e tij, ndryshe nga sa sillet shteti grek, i cili sipas emigrantit i trajton si njerëz.
Emigranti Gushtani thotë se në kufi po kalojnë edhe derrat ndërsa emigrantët nuk lejohen të kthehen në tokën e tyre.
Apeli i emigrantit: Përshëndetje, jemi emigrantët që jemi kthyer nga Greqia dhe jemi në tokë neutrale të Kakavijës ku asnjë shqiptar policia nuk e lejon të kalojë tutje sepse nuk na jepet asnjë urdhër, as nga ambasadat, as nga shteti shqiptar. Ne jemi shqiptarë, me pasaportë shqiptare, me vula me të gjitha dhe greku sillet me ne si njerëz dhe shteti ynë shqiptar me në krye kryeministrin na trajtojnë si qenër. Po kalojnë fortigotë me derra dhe me lopë e me kafshë dhe ne shqiptarët që jemi me dokumente dhe pasaportë shqiptare ne refuzohemi nga shteti jonë. Nuk na pengon as Kushtetuta. Meqë Rama thotë se jemi në luftë, atëherë të gjithë shqiptarët duhet të jenë në tokën e tyre për të ruajtur dhe mbrojtur vendin e tyre.
