Sociologu Gëzim Tushi ka komentuar në MCN skandalin te Onkologjiku të cilin e ka konsideruar si një ngjarje tragjike ku e keqja është banalizuar.
Ai tha se spitalin e kemi parë si institucion, nuk jemi marrë sa duhet me ta dhe se kemi probleme me caktimin e diagnozave dhe mjekimin.
Sipas tij shqiptarët po humbasin besimin tek spitalet dhe mjekësia dhe kjo është një situatë shqetësuese për shoqërinë shqiptare, ku më e rëndë është fakti se mjekët po bashkohen me të keqen dhe janë bërë aleat me të.
“Unë e kam përjetuar shumë keq, është ngjarje e rëndë dhe tragjike nuk është një ngjarje e zakonshme, e keqja në shëndetësinë tonë është banalizuar, do të thotë se kemi të këqija në shoqëri, institucionet publike si spitalet që kanë të bëjnë me shëndetësinë e njeriut.
Besoj se ngjarja e Onkologjikut është një precedent. Për të bërë një diagnostikim të kësaj situate ngjarja aty përveç kriminale është një ngjarje që ka shkelur dy dimensione të rëndësishme të shëndetësisë, e para mbrojtja e jetës së njerëzve dhe e dyta parimi i rëndësishëm i humanizmit kur mjekët kanë për detyrë të ndihmojnë njerëzit e sëmurë. Ne nuk jemi marrë si duhet me institucionet e spitalit.
Po siç ju e theksuat këto janë institucione polivalente, përveç se merren me shërimin e sëmundjes, agravohen nga korrupsioni me mungesën e medikamenteve. Institucionet e spitaleve kanë dhe një problem tjetër, i sëmuri, pacienti e shikon mjekun si perëndi dhe se pas asaj recete mendon se është shpëtimi jeta dhe në këtë kontekst përveç problemit me diagnostikimin dhe riparimin e sëmundjes ne kemi probleme me konfrontimin, ku përveç se janë të dëshpëruar nga sëmundja që kanë ata përballen me njerëz cinik. Kjo është një çështje e madhe e moralit të mjekësisë në Shqipëri që është katandisur në këtë mënyrë.” – tha Tushi.
Më tej ai shtoi se indiferenca e qytetarëve që prek jetën e tyre është e lidhur me një ndarje metafizike mes qytetarit dhe atyre që kanë role dhe funksione publike.
“Shqiptarët kanë ulur besimin te politika, te spitalet, te gjithçka që është publike dhe kjo ka krijuar një situatë deprimimi duke menduar se asgjë nuk është shtetërore dhe hallet janë individuale, njeriu duhet të përplas kokën dhe të gjejë vetë zgjidhjen e problemeve. Kjo indiferencë e përhapur si limf është bërë neuroparalizuese.
Kjo është e keqe dhe në njëfarë mënyre duke qenë se jemi individualizuar secili te hallet e veta ka humbur kohezioni social, ka humbur ndjenja e përbashkët dhe ka bërë që e keqja të banalizohet dhe shtohet në çdo cepë të shoqërisë. Problemi është se shëndeti shoqëror duke arritur te ai spitalor janë tronditur thellë, prandaj rasti i Onkologjikut nuk duhet kaluar me 3-4 bluza bardha, por duhet të evidentohet se ku janë problemet sepse situata po agravohet më shumë.
Besoj se nuk ka rast përtej më të madh se Onkologjiku, mjek që ndikojnë në vdekjen e njeriut dhe të mos kenë pikë emocioni por ta bëjnë me një llogari matematike kjo tregon se e keqja ka marr përmasa shumë të mëdha. Mjekët po bashkohen me të keqen dhe janë bërë aleat me të dhe në spitale nuk po respektohen liritë e individit.” – tha Tushi./ S.M
