Elona, vajza e autorit të mirënjohur shqiptar, Dritëro Agolli ka shkruar disa fjalë zemre për ikjen e të madhit, kolosit të letrave shqipe dhe kolegut të nderuar të babait të saj, Ismail Kadaresë.
Në një postim në rrjetin social, Facebook, Elona shkruan se ndonëse ai do të kishte dashur një fund ndryshe pa shumë dhimbje dhe të qetë, ashtu siç e dëshiroi edhe i ati i saj vite më parë, megjithatë vdekja vendos vetë për mënyrën si vjen me të marrë drejt rrugës së pafundësisë.
“Ndoshta do të kishin dashur të prisnin ndryshe të fundmen ditë …njëlloj ashtu siç i madhi Niko Kazanxaqis admironte vdekjen në këmbë , të njëjtë me ushtarët e Pompeut. Apo si ai që përfshihej nga llava e vdiste në këmbë si statujë.
Edhe atë ditë që babi nuk më lëshonte duart nga flokët duke i tërhequr si litarë, atë ditë në spitalin me muret gri dhe frymën e kobshme të vdekjes , ai këtë gjë donte të më thonte. Jam e bindur që edhe ai , miku i hershëm dhe i gjithjetshëm i babait tim, ashtu do ta dëshironte”,– shkruan Elona.
Elona vijon se pavarësisht këtij fakti të dhimbshëm, të largimit të trupit njëherë e përgjithmonë nga kjo botë, Kadare do të mbetet i gjallë, ashtu siç përherë të mëdhenjtë shkrimtarë e kanë që të mbeten të gjallë ndër të gjallët, e të ndriçuar ndër më të ndriçuarit me veprat e tyre të skalitura në përjetësi në histori.
“E sido që të jetë, Ismail Kadare që sot do të prehet në banesën e fundme, me kurmin në tokë , por shpirtin afër qiellit, ashtu siç përherë të mëdhenjtë shkrimtarë e kanë, në jetën tokësore por edhe në atë në amshim, brez pas brezi e shekull pas shekulli, do të mbetet më i gjallë ndër të gjallët, më i ndriçuar ndër të ndriçuarit .
Lamtumirë i adhuruari shkrimtar ! Lamtumirë, për mua, xhaxhi Ismail!”- përfundon vajza e shkrimtarit Dritëro Agolli, Elona.
Kolosi i letrave shqipe, Ismail Kadare është përcjellë ditën e sotme për në banesën e fundit. Në teatrin Kombëtar të Operas dhe Baletit u mbajtën homazhe në nderim të figurës së tij.
Personalitetet të njohura nga Shqipëria, Kosova dhe Shkupi, diplomatë të huaj, kolegë, familarë dhe të tjerë dashamirës ishin të pranishëm për t’i dhënë lamtumirën e fundit gjigandit të letërsisë shqipe.
Ismail Kadare mbylli sytë përgjithmonë mëngjesin e të hënës së 1 korrikut në moshën 88 vjeçare. Ai do të mbetet gjithmonë në memorien e shqiptarëe dhe lexuesve mbarëbotërore, si njeriu që ndryshoi historinë dhe lartësoi letërsinë shqipe në arenën ndërkombëtare. S.B
