Nicolo Zaniolo rikthehet në Serinë A. Pas një viti e gjysmë shtegtim në Turqi dhe Angli, sulmuesi i talentuar Italian do të bashkohet me klubin e Atalantës, që ka arritur marrëveshjen me Galatasarayn, skuadër që ka edhe pronësinë e kartonit të tij.
Media italiane bën me dije se këtë të enjte Zaniolo do të kryejë testet mjekësore për llogari të Atalantës, para se të firmosë me klubin bergamask dhe të bëjë prezantimin zyrtar.
Marrëveshja me Galatasarayn është arritur mbi bazën e huazimit me të drejtë blerjeje, që mund të shndërrohet në detyrim blerjeje nëse Zaniolo arrin të luajë 65% të ndeshjeve me fanellën e Atalantës.
Klubi fitues i Europa Leagues mposhti kështu konkurrencën e Fiorentinës për të rikthyer në Itali Nicolo Zaniolon, i cili spikati me fanellën e Romës, para se të largohej nga kryeqyteti Italian në dimrin e 2023-shit, për t’u transferuar te Galatasaray.
Sezonin që lamë pas Zaniolo ishte pjesë e Aston Villës në Premier League, ku luajti pak dhe nuk arriti të lërë gjurmë, teksa një dëmtim e la jashtë edhe Kampionatit Europian Gjermani 2024.
