Rreth 8.5 milionë pajisje Windows janë prekur nga një përditësim i gabuar i softuerit që ka shkaktuar ndërprerje në shkallë globale, ka njoftuar gjigandi amerikan i teknologjisë Microsoft.
Kjo është më pak se një përqind e të gjithë kompjuterëve Windows, tha kompania në blogun e saj. Megjithatë, ndikimet e përhapura ekonomike dhe sociale kanë treguar se sa kompani që menaxhojnë shërbime kritike kanë përdorur shërbimet e CrowdStrike. Një dështim i IT shkaktoi ndërprerje të konsiderueshme në të gjithë botën të premten.
Pothuajse paralizoi trafikun ajror në shumë vende dhe u prekën gjithashtu supermarkete, banka, spitale, media dhe institucione të tjera. CrowdStrike përmendi një përditësim të gabuar të softuerit të Windows si shkak. Kompania deklaroi se problemi u zgjidh të premten pasdite, por pati disa pasoja më vonë.
Ndërkohë, trafiku ajror në Gjermani është kthyer kryesisht në normalitet, njoftoi Shoqata e Aeroporteve Gjermane (ADV). Zyra Federale për Sigurinë e Informacionit (BSI) tha të shtunën pasdite se situata po stabilizohet në shumë fusha, por shumë kompani vazhdojnë të luftojnë me pasojat e ndërprerjes.
“Nuk është përcaktuar ende përfundimisht se si kodi i gabuar hyri në përditësimin e CrowdStrike. BSI është në komunikim intensiv me kompaninë për këtë,” tha zyra./kb