Parlamenti është mbledhur në seancën e fundit për këtë sesion parlamentar ku janë votuar dekretet për ndryshimet në Qeveri, por gjithashtu do të zgjidhet edhe Kryetarja e re e Kuvendit, pas dorëheqjes së paraqitur nga Lindita Nikolla, javën e shkuar.
Por kjo seancë e fundit parlamentare duket se ka prishur atë qetësinë dhe konsensusin e javës së kaluar, kur demokratë dhe socialistë u bënë bashkë dhe votuan ndryshimet në Kodin Zgjedhor.
Shkak për tensionet në sallë që më pas shkaktuan edhe kaosin ishte rrëzimi i kërkesës së paraqitur nga demokratët për një debat lidhur me ndryshimet në Qeveri.
Kërkesa në emër të PD-së u paraqit nga Gazment Bardhi, kreu i Grupit Parlamentar, që kërkonte një debat 6 orësh lidhur me ndryshimet në Qeveri.
Kjo u pasua nga një reagim në grup i deputetëve të PD-së, një pjesë e të cilëve zaptuan foltoren e Kuvendit, ndërsa të tjerë i binin tavolinave duke krijuar zhurmë, si ajo e shumë muajve më parë, kur tensionet ishin evidente në pothuajse çdo seancë.
“Hajdut, mafioz, gënjeshtare”, ishin disa nga artikulimet e Gazment Bardhit në sallën e Kuvendit, duke iu drejtuar kabinetit qeveritar ku ndodhej edhe Kryeministri Edi Rama dhe kryeparlamentares, Lindita Nikolli. S.B
