Kush e di nëse komedia romantike “Një princ për mua” e Martha Coolidge (2004) është inspiruar nga historia e dashurisë mes australianes Mary Donaldson dhe princit Frederik të Danimarkës. Sepse drama romantike është shumë e ngjashme me përrallën që i përfshin ata. Një princ shkon me pushime jashtë vendit dhe rastësisht njihet (dhe bie në dashuri) me një vajzë të zakonshme që nuk e di rangun e tij. Me një vazhdim si në skenarin e filmit: pengesa, vështirësi, sfidat në oborrin mbretëror, dashuria që triumfon mbi gjithçka dhe më pas fundi i lumtur.
Një histori dashurie si në përralla ajo e Frederik, fëmija i parë i mbretëreshës Margrethe II të Danimarkës dhe princit konsort Henrik. Në shtatorin e vitit 2000 ai vendos të shkojë në Sidney për Lojërat Olimpike si mbështetje për ekipin e velave. Ndryshe nga mbretërit anglezë, Frederik, i cili atëherë ishte 32 vjeç, mund të shijonte si turist i rastit pa u njohur aq shumë. Në mbrëmjen e 14 shtatorit 2000, ai del nga hoteli me një grup miqsh, përfshirë Bruno Gómez Acebo, nipin e mbretit të Spanjës, vëllain Joachim, Martha Louise të Norvegjisë dhe Nicolas të Greqisë. Destinacioni është Slip Hinn, një pub tërheqës në Darling Harbour.
Atë natë, fati e sjell edhe Mary Donaldson, një vajzë 29-vjeçare nga Tasmania, agjente imobiliare dhe këshilltare financiare, së bashku me Andrew Miles, një mik me të cilin ndante apartamentin. Ata prisnin të takoheshin me një grup miqsh që kishin mbërritur në Sidney për Lojërat Olimpike. Në ato ditë, një milion turistë arrinin në Australi.
Ishte padyshim një natë magjike, plot emocion: të nesërmen pritej inaugurimi. Lokali ishte i mbushur me njerëz dhe ata u njohën mes birrave si shumë të tjerë. Frederik tregoi pak për veten, tha se koleksiononte gjobat për shpejtësi dhe se i pëlqente të bënte tatuazhe. Ajo u ndje menjëherë e tërhequr nga ky evropian që fliste anglishten në mënyrë perfekte. Rezultati: ata filluan të takohen gjatë gjithë Lojërave, ndërruan numrat e telefonit dhe premtuan të shiheshin përsëri. Dhe me të vërtetë, kështu ndodhi.
Një marrëdhënie në distancë
Filluan një marrëdhënie në distancë: Frederik kthehej në Australi, ku mund të ndihej më i lirë. Ata i dërgonin njëri-tjetrit dhurata përmes postës: ajo i dërgoi një CD të grupit australian Powderfinger, ai ia ktheu me grupin danez Sort Sol. Shijonin momentet së bashku, por sa herë që ai kthehej në Danimarkë ndjenin një boshllëk të pakundërshtueshëm, siç treguan vite më pas në një intervistë.
Ajo është vajza e një matematicieni, John Dalgleish Donaldson, dhe e Henrietta Clark Home, asistente e rektorit të universitetit të Tasmanisë. Më e vogla nga katër fëmijë, Mary ka një diplomë në Juridik dhe punonte gjithashtu me disa kompani reklamuese. Një grua me xhinse dhe një bluzë, do ta përshkruante ajo veten vite më pas.
Por lumturia zgjati pak: në vitin 2001, historia shfaqet në gazetat, tabloidi danez Billed Bladet e jep së pari lajmin. Mary vendos të transferohet në Evropë. Shkon të jetojë në Paris, ku mëson anglisht, dhe më pas në Kopenhagë, ku shtypi shpesh i “kap” çiftin së bashku. S.B
