Kryeministri Edi Rama i është rikthyer edhe njëherë hapjes së negociatave për grup-kapitullin e parë. Në Podcastin ‘Flasim’, kreu i qeverisë foli edhe për gjendjen shëndetësore për shkak të operacionit, ndërsa iu përgjigj edhe kritikave se Shqipëria nuk ka bërë progres.
Kryeministri thotë se që në fillimin objektivi i tij ka qenë që integrimi i Shqipërisë në Bashkimin Europian deri në vitin 2030. Kreu i qeverisë nënvizoi se pavarësisht se politika e BE-së hera herës na ka mbyllur derën, Shqipëria nuk ka ndalur së bëri detyrat për të qenë gati kur momenti i përshtatshëm politik të vinte. Rama shprehet se ku rrugëtim ka dy korsi.
“Objektivi im që ditën e parë ka qenë 2030. Bashkimi me Europën është një rrugë me dy korsi: korsia e punës së përditshme të reformave, masave dhe vlerësimeve faktike dhe teknike që bëhen në Komisionin Europian dhe është korsia politike, sepse ajo është një familje politike që vendos përtej atyre që janë kritere objektive”, tha Rama.
Në veçanti, kreu i qeverisë u ndal tek kapitulli i gjyqësorit dhe lufta kundër korrupsionit. E për të luftuar korrupsionin, Rama thotë se kjo qeveri ngriti SPAK dhe GJKKO dhe u ‘zhvesh nga imuniteti’. Për herë të parë që nga 1912, kryeministri thotë se kemi persona të lidhur me pushtetin politik, me qeverinë në fuqi apo nga ata që ishin në qeveri, që janë të akuzuar, të hetuar apo dënuar.
“Ca bëmë ne? Heqje dorë nga pushteti politik mbi gjyqësorin dhe krijimin e SPAK, GJKKO për të luftuar korrupsionin ne hapëm këmishën dhe u ekspozuam bashkë me gjithë të tjerët. Jemi në pushtet, por s’jemi të imunizuar. Për herë të parë në historinë e këtij vendi, nga 1912 deri më sot, për herë të parë kemi persona të lidhur me pushtetin politik, me qeverinë në fuqi apo nga ata që ishin në qeveri në një raport shumë më të zhdrejtë se ç’duhet të jetë, që janë hetuar, nën hetim, të akuzuar, të dënuar nga Gjykata të pavarura nga pushteti politik. Si qenka kjo që nuk paskemi bërë progres dhe paska korrupsion gjithandej.
Qeveria ka detyrën të shfrytëzojë mandatin e saj që të garantojë me mospërfshirjen e saj pavarësinë e gjyqësorit dhe të mbështesë përmes kuvendit fuqizimin e gjyqësorit, duke ndërmarrë reforma dhe masa. Ky proces nuk është ti tregojmë Brukselit, por ta ndërtojmë këtu BE. BE është brumi i vetëm i djes për shtet ndërtimin”, u shpreh Rama.
Për Ramën, Shqipëria nuk ka rrugë tjetër veçse ajo e integrimit në BE, pasi vetëm aty mund të garantohet liria individuale, ligjore dhe demokracia funksionale.
“Ka një gjë që është themelore. BE nuk është perfekt ka nevojë për t’u rimenduar në funksion të projektit, duhet thelluar. Ne në qindra vjet s’kemi pas mundësi të zgjedhim, për ne kanë zgjedh tjerët. Kemi kaluar nga perandori, nëpër regjime. Mundësia për të zgjedhur na erdhi kur ra muri i Berlinit. Kudo mund të ketë arsye për të parë që funksionojnë, por askund për ne, në asnjë drejtim, përveçse në BE nuk mund të ketë garanci në breza për lirinë individuale. Është hapësira e lirisë së garantuar individuale dhe kjo nuk negociohet, nuk bluhet dhe nuk shitet me asgjë.
E dyta për rendin ligjor, për atë që po përpiqemi ta ngremë për herë të parë në historinë një rend ligjor demokratik. Ka vështirësi dhe sot po shfaq dobësi edhe vetë në BE për shkak të ndryshimit të strukturë politike, partiake. Liria individuale, ligjore, të gjithë të barabartë para ligjit dhe një demokraci funksionale gjenden vetëm aty dhe vetëm në atë sofër mund ti garantosh”, tha Rama.
E ftuar në Podcatin ‘Flasim’ ishte edhe ministrja e shtetit për Administratën Publike dhe Antikorrupsionin, e cila foli për punën e bërë deri më tani për integrimin, ndërsa theksoi se tashmë kjo rrugë është e pakthyeshme.
“Ky proces është i pakthyeshëm. Lupa e Komisionit Europian ështe me rigoroze ndaj nesh që jemi jashtë BE për të parë nëse ne po ecim në drejtimin e duhur, nëse ne krijojmë një pushtet gjyqësor të pandikuar. Lufta kundër korrupsionit nuk i përket vetëm gjyqësorit, por edhe mekanizmave që ne kemi ngritur”, tha ministrja.
Kryeministri dhe ministrja e tij, e quajtën reformën në drejtësi si avantazhin më të madh që Shqipëria ka sot, si një detyrë e bërë paraprakisht, dhe e konsideruan komisionin e Fatmir Xhafajt për anti-korrupsionin, si domosdoshmëri për BE-në.
Me batuta preferoi Rama ta mbyllë bisedën duke thënë se “Jemi ulur në tryezë dhe po negociojmë kushtet e martesës, por që do martohemi kjo është e sigurt dhe do marrë fund”.
Shqipëria çeli më 15 tetor 2024 negociatat për grup-kapitullin e parë me Bashkimin Evropian. Konferenca e dytë ndërqeveritare u mbajt në Luksemburg, ku vetë përfaqësuesit e Brukselit bënë thirrje për përshpejtim të procesit. Nga ana tjetër kryeministri Edi Rama e konsideroi në ditë historike, por pa kursyer edhe këtë kritikat ndaj BE-së për zvarritjen e procesit./E.T
