Kandidatët presidencial për Shtëpinë e Bardhë, Kamala Harris dhe Donald Trump kanë intensifikuar sulmet e tyre politike ndaj njëri tjetrin ndërsa vetëm 4 ditë na ndajnë nga zgjedhjet presidenciale të nëntorit.
Në tubimin e kandidates demokrate në Las Vegas, në skenë u ngjit këngëtarja dhe aktorja e mirënjohur Jennifer Lopez, e cila mbajti një fjalim emocionues për prejardhjen e saj Puerto Rikane pasi një komedian në tubimin e republikanëve e quajti ishullin e Karaibeve një vend plehrash që noton mbi ujë. Jennifer Lopez e cila u shfaq në mbështetje të Kamala Harris në Las Vegas tha se me zgjedhjen e demokrates, fundi i këtyre zgjedhjeve do të sjellë më të mirën për Amerikanët.
“Unë jam një aktore dhe një këngëtare dhe më pëlqejnë si përfundojnë gjërat në Hollywood. Më pëlqen kur në fund fiton djali i mirë dhe në rastin tonë do të fitojë ajo vajza e mirë. Ju nuk mund të thoni amerikan pa thënë Rikan. Ky është vendi ynë, ne duhet të ushtrojmë të drejtën tone për të votuar dhe për të zgjedhur në 5 nëntor.”, tha Lopez.
Harris e cila u ngjit në skenë pas këngëtares Jennifer Lopez deklaroi se demokratët do të fitojnë në Nevada sepse ata janë të lodhur nga ndasitë që krijon rivali i saj Donald Trump.
“Ne do të fitojmë, ne do të fitojmë sepse e dini çfarë unë besoj? Unë besoj se kur ju e dini se për çfarë luftoni, atëherë ju e dini edhe se çfarë zgjidhni. Ne kemi mundësinë në këto zgjedhje të ndryshojmë faqen për Amerikën pas një dekade ku Donald Trump është përpjekur të na mbajë të ndarë dhe të frikësuar nga njëri tjetri. Kjo punë ka mbaruar, jemi të lodhur dhe të rraskapitur nga ai. Ne e dimë shumë mirë kush është ai dhe s’kemi nevojë për të.”, tha Harris.
Edhe Donald Trump u shfaq me përforcime në shtetin e Arizonës ku në skenë ju bashkua prezantuesi dhe gazetari i mirënjohur Konservativ Tucker Carlson.Republikani u shpreh se ai do ta fitojë sërish Shtëpinë e Bardhë ndërsa tha se demokratët janë të gjithë mashtruesa.
“Dhe siç iu kam thënë ne do ta bëjmë këtë gjë. Ne do ti fitojmë sërisht zgjedhjet dhe kësaj here në mënyrë spektakolare. Jemi vetëm 4 ditë lart. Do të fitojmë mbi ata tradhëtar sepse ata janë një tuf tradhëtarësh. Nëse i mposhtim ata do te kemi një fitore të mahnitshme. Mendoj se do ta bëjmë diçka të tillë, do ti mposhtim ato mashtrues .”, theksoi Trump.
Në fjalimin e tij Donald Trump sulmoi ashpër ish republikanen Liz Cheney që ka dale në mbështetje të rivales së tij Kamala Harris duke e quajtur atë një skiftere lufte.
Ndërsa vetëm 4 ditë na ndajnë nga zgjedhjet presidenciale në SHBA, mbi 65 milionë qytetarë kanë hedhur votat e tyre në votimin e parakohshëm duke thyer kështu edhe rekordin e vitit 2020 sa i përket pjesëmarrjes. Të drejtën për të votuar në zgjedhjet e 5 nëntorit e kanë më shumë se 240 milionë qytetarë amerikanë. S.B
