Kreu i Organizatës Botërore të Shëndetësisë Tedros Adhanom Ghebreyesus, ka mbrojtur veten e tij pas akuzave të shumta se nuk paralajmëroi në kohë shpërthimin e pandemisë.
Sipas Ghebreyesus, bota kishte kohën e mjaftueshme për të reaguar ndaj koronavirusit.
“Njoftimi i 30 janarit dha kohë të mjaftueshme për pjesën tjetër të botës për të dalë me një përgjigje sepse kishte vetëm 82 të infektuar në atë kohë dhe nuk kishte vdekje jashtë Kinës”, tha Tedros në një konferencë shtypi virtuale të mbajtur në selinë e OBSH-së në Gjenevë.
Sipas tij, në ditët para shpalljes së kërcënimit global, OBSH vizitoi Kinën për të hetuar më shumë rreth koronavirusit virusit të ri.
Gjatë asaj vizite, sipas kreut të OBSH me Kinën u arrit një marrëveshje për të dërguar hetuesit e saj.
Marrëdhënia SHBA-OBSH
Ai u pyet për marrëdhëniet me Shtetet e Bashkuara, donatori më i madh i organizatës, shtet i cili tërhoqi fondet, pasi kritikoi menaxhimin e pandemisë së OBSH-së. “Ne jemi në të vërtetë në kontakte të vazhdueshme dhe bashkëpunojmë”, u përgjigj Tedros. Tedros gjithashtu tha që OBSH dëshiron të punojë me qeveritë për hapjen graduale të trafikut të udhëtarëve.
