Një pjesë e madhe e qarqeve të vendit janë pa energji elektrike. Raportohet se rreth orës 17:40, Durrësi, Vlora, Fieri, Lushnja e Saranda u përfshinë nga terri.
Pa drita mbetën edhe Kavaja, Shkozeti e Rrogozhina. Në Vlorë, energjia elektrike mungoi po ashtu në fshatrat Selenicë, Orikum e deri në Palasë.
Mësohet se shkak është bërë një defekt në linjën e furnizimit 220 kilovolt, duke mos furnizuar me energji nënstacionin e Spitallës dhe Rrashbullit. Për pasojë gjithë Durrësi dhe qytete drejt jugut kanë mbetur pa energji.
Mungesa e energjisë ka krijuar problem si në lëvizjen në të gjitha qytetet, ashtu edhe te bizneset që varen nga energjia elektrike. Energjia ka qenë e stakuar kudo dhe në qytetet e mësipërme ka qenë terr në çdo rrugë./ S,M
