Aplikacioni kinez i rrjeteve sociale RedNote është bërë aplikacioni më i shkarkuar në App Store të Apple në SHBA ditët e fundit, përpara një ndalimi të mundshëm të TikTok në SHBA.
Revanshi i këtij aplikacioni vjen në një kohë kur kompania ByteDance, që ka në pronësi TikTok, po përballet me perspektivën e një ndalimi të përhershëm të platformës popullore në Shtetet e Bashkuara të dielën, kur vendimi qeveritar do të hyjë në fuqi.
Ligji, i nënshkruar nga presidenti amerikan Joe Biden prillin e kaluar, kërkon që TikTok të ndërpresë lidhjet me kompaninë e tij mëmë me bazë në Kinë, ByteDance, deri në mes të janarit ose aplikacioni do të ndalohet.
Masa nga SHBA erdhi si rezultat i shqetësimeve midis disa politikanëve amerikanë se ByteDance po ndante të dhënat e përdoruesve të TikTok me qeverinë kineze, pavarësisht garancive të përsëritura të kompanisë se nuk ishte kështu.
Edhe pse ka shumë platforma video si TikTok të disponueshme në treg, është evidente se në 24 orët e fundit shumë përdorues nga SHBA po vërshojnë te RedNote, duke e parë atë si “alternativën” më të mirë.
Por pse ndodh kjo dhe çfarë është RedNote?
RedNote, i njohur si Xiaohongshu në Kinë, është një aplikacion i rrjeteve sociale tani i disponueshëm në anglisht. Është një aplikacion i krijuar në vitin 2013 nga kompania me bazë në Shangai, Xingyin Information Technology dhe është jashtëzakonisht popullor në vendet që flasin gjuhën mandarine dhe kineze, me mbi 300 milionë përdorues aktivë mujorë, sipas Bloomberg.
Edhe pse është rritur në mënyrë të qëndrueshme gjatë viteve, rritja më e madhe e popullaritetit të saj u regjistrua gjatë pandemisë.
Sipas Sky News, nuk kemi të bëjmë me një klon të TikTok, pasi shumë e krahasojnë RedNote më shumë me Instagram. Ndërsa u ofron përdoruesve video dhe imazhe të shkurtra përmes një algoritmi si TikTok, postimet me tekst dhe veçoritë e blerjeve luajnë gjithashtu një rol qendror. Ndërfaqja e aplikacionit ndryshon nga ajo e TikTok, pasi video nuk fillon të luhet automatikisht me hapjen e aplikacionit dhe përdoruesit duhet së pari të identifikohen për ta përdorur atë.
Në Kinë, Xiaohongshu është aplikacioni i zgjedhur për ata që kërkojnë rekomandime mbi temat e njohura të bukurisë, modës, udhëtimit dhe ushqimit. Përdoruesit e tij janë kryesisht femra të reja. Për më tepër, platforma i nënshtrohet më pak censurës se të tjerat, pasi përdoruesit postojnë në të përmbajtje nga komuniteti LGBTI+ ose diskutojnë aspektet pozitive të beqarisë për gratë, çështje që konsiderohen veçanërisht të ndjeshme në Kinë.
Fluksi i amerikanëve tani u jep përdoruesve kryesisht kinezë të Xiaohongshu një shans për të kërkuar ndihmë me detyrat e shkollës ose këshilla për përkthimin e termave në anglisht, duke u dhënë gjithashtu një shans për të mësuar për kulturat e njëri-tjetrit.
“Është argëtuese dhe ironike që amerikanët dhe kinezët po takohen në internet për shkak të ndalimit të qeverisë amerikane për TikTok”, tha 26-vjeçarja Amanda Zhang.
Kjo krijuese e përmbajtjes dhe studente në SHBA shprehu shqetësimin e saj se Xiaohongshu gjithashtu mund të ndalohet nga autoritetet amerikane nëse platforma vazhdon të tërheqë përdoruesit amerikanë.
Çfarë i shtyn përdoruesit amerikanë të TikTok drejt RedNote?
Nëse qëllimi i përdoruesve të TikTok në SHBA ishte thjesht gjetja e një platforme tjetër të mediave sociale me video të shkurtra, atëherë aplikacionet e njohura perëndimore si Instagram dhe Facebook, në pronësi të Meta, mund të ishin një alternativë.
Megjithatë, disa krijues amerikanë në TikTok – shumë prej të cilëve sigurojnë jetesën nga aplikacioni – po u bëjnë thirrje ndjekësve të tyre të shkarkojnë RedNote për t’i dërguar një mesazh të qartë qeverisë amerikane se ajo ka kaluar kufirin duke e ndaluar aplikacionin.
Një përdorues amerikan i TikTok tha në një video: “Qeveria jonë, jam i bindur, i pëlqen të na shohë të pakënaqur dhe me vështirësi…RedNote, një aplikacion tjetër kinez me bazë në atë vend sot është aplikacioni numër një në App Store, është thjesht e mrekullueshme.”
“Ata po përpiqen të ndalojnë TikTok sepse thonë se Kina po vjedh të dhëna. Ata nuk ndalojnë asnjë kompani amerikane të vjedhë të dhënat tona”, u ankua një tjetër përdorues.
Ai ka 264,000 ndjekës dhe thotë se ka zgjedhur të shkarkojë aplikacionin Xiaohongshu, në vend që t’i drejtohet platformave amerikane si Instagrami dhe Facebook, pasi ai i konsideron ato aplikacione për “të moshuarit”, të cilat gjithashtu “vjedhin të dhënat personale dhe ua shesin kompanive të tjera”.
“Kjo është arsyeja pse shumë amerikanë janë të zemëruar tani, ne preferojmë që Kina të ketë të dhënat tona”, theksoi ai.
Edhe përdorues të tjerë ndajnë këtë mendim. “E di që qeveria jonë është pak raciste, por unë ju dua ju kinezë. Nuk më intereson nëse merrni të dhënat e mia. Merrini ato”, shpjegoi i porsaardhuri në platformën Xiaohongshu, Adam, në një video që postoi të hënën.
Ky trend tregon se sa vendim “idiot” është ndalimi i TikTok, tha Milton Mueller, një profesor në Georgia Tech në SHBA, i cili ngriti një çështje në Gjykatën e Lartë duke shpjeguar kundërshtimin e tij ndaj masës.
“Duket sikur ndalimi i TikTok i shtyu përdoruesit drejt aplikacioneve të tjera që janë edhe më pak të shkëputura nga Partia Komuniste Kineze”, vuri në dukje Robin Kaplan nga Universiteti Duke.
Për Meng Bingchan, profesoreshë në London School of Economics, fenomeni demonstron joefektivitetin e strategjisë amerikane kundër sektorit të teknologjisë kineze, e cila përmblidhet me shprehjen “kopsht i vogël, gardh i lartë”. Domethënë, Uashingtoni po përpiqet të kufizojë një numër të vogël aplikacionesh teknologjike që konsiderohen të ndjeshme për sigurinë kombëtare amerikane.
“Kopshti nuk ndalon së rrituri dhe gardhi është plot me vrima. Aq më keq, në këtë rast të veçantë, ata që jetojnë brenda gardhit mund të lëvizin në hapësirën dixhitale”, tha Meng./e.t
