Babai i Greta Thunberg u pyet se sa krenar është për vajzën e tij dhe përgjigja që ai dha ishte tepër konfuze.
Duke folur në programin e “BBC-së” sot, Svante Thunberg tha se ai nuk është “aspak krenar” për vajzën e tij aktiviste dhe se nuk i intereson krenaria. Kur u pyet rreth arritjeve të vajzës së tij, babai i Thunberg e ktheu bisedën te vetja.
“Jam krenar që kam kontribuar, sepse unë e kam dëgjuar Gretën. Unë bashkë me bashkëshorten time i kemi marrë parasysh mendimet e saj”.
Svante Thunberg u shpreh se ai dhe gruaja e tij nuk e mbështesnin nismën e vajzës së tyre mbi ndryshimet klimatike pasi ajo do të merrte shumë urrejtje dhe jo të gjithë do ta mbështesnin.
Greta Thunberg pati një bisedë në “Skype” me David Attenborough, një shkrimtar dhe ambientalist, i cili i tha asaj se është mirënjohës që ajo ka arritur atë që shumë njerëz nuk e kanë arritur dot në njëzet vjet.
Duke folur me Mishal Husain, Svante Thunberg vazhdoi të zbulojë rreth depresionit të së bijës përpara se ajo të fillonte protestat e saj mbi klimën. “Tre ose katër vite para se të niste protestat në shkolla, ajo ishte e sëmurë. Greta nuk fliste, nuk ushqehej dhe nuk bënte asnjë lloj aktiviteti. Ajo ndaloi së shkuari në shkollë dhe nuk ka dalë nga shtëpia për një vit rresht.”
Përkushtimi i saj ndaj nismës që ndërmori e ndihmoi atë të gjente sërish lumturinë, shpjegon ai. Ajo u normalizua pas tre muajsh dhe filloi të ushqehej mirë dhe të ndante biseda me persona të tjerë.
Ju mund të mendoni se ajo është një fëmijë i jashtëzakonshëm sepse është e veçantë dhe shumë e famshme, por për mua ajo është një fëmijë si gjithë të tjerët. Ajo bën gjërat që bën çdo moshatar i saj dhe ajo është e lumtur në këtë mënyrë.
Ndërsa komentet e Svante Thunberg në lidhje me krenarinë mbi vajzën e tij do t’u duken shumë prindërve të çuditshme, është e qartë se ai tani po e mbështet vajzën e tij dhe ndikimin e madh që ajo ka pasur në çështjet globale të klimës.
Megjithëse ai shpreson që jeta e tyre të bëhet “më pak intensive” në të ardhmen, Svante Thunberg i ka premtuar Gretës se do ta shoqërojë atë në udhëtimet e saj nëpër botë, sa herë që ajo të ketë nevojë./Fjala.al/Burimi:The Indipendent
