Artan Hoxha, dekani i Fakultetit të Drejtësisë, është i vetmi kandidat për Rektor në Universitetin e Tiranës.
Komisioni Institucional i Zgjedhësve ka shpallur edhe Listën për kandidatë për “Rektor” dhe “Anëtar i Senatit Akademik” përfaqësues nga personeli akademik dhe i studentëve.
Gjithashtu është publikuar edhe lista me kandidatët për drejtues të Departamenteve në Fakultetin e Historisë dhe Filologjisë.
Sabri Laçi vijon të jetë i vetmi kandidat për dekan në fakultetin e Histori-Filologjisë. Për departamentin e Gazetarisë kandidon Mark Marku dhe Valentina Duka në atë të Historisë.
Në departamentin e Gjuhës Shezai Rrokaj, ndërsa në atë të Letërsisë, në garë janë Lili Sula dhe Persida Asllani. Nga ana tjetër, Dhori Kule ka hedhur kandidaturën një tjetër mandat në krye të fakultetit të Ekonomisë, ndërsa Romeo Hanxhari kërkon drejtimin e Gjeografisë.
“Për 48 orë do të verifikohen edhe aplikimet e studentëve kandidatë për anëtarë të Senatit Akademik, përfaqësues i studentëve, kjo, pasi aplikimi online në orët e fundit e pati të papërballueshme volumin e dokumenteve të tyre me mbi 1500 mbështetës gjithsej( 100 për çdo kandidat) nga sekretaritë mësimore”, u shpreh kryetarja e Komisionit Institucional të Zgjedhësve, Majlinda Keta.
Pas administrimit të emrave do të jetë Komisioni Zgjedhor që do të paraqesë strategjinë për fushatën e kandidatëve, ndërsa Ministrja e Arsimit do të shpallë dhe datën e votimeve. Nga ana tjetër, Ministria e Arsimit ka shtyrë datën e zgjedhjeve në universitete në një afat të pacaktuar ndërsa procesi përgatitor do të vijojë për të mundësuar nisjen e fushatës pas shpalljes së datës së re.
