Ministri i Brendshëm, Sandër Lleshaj deklaron se çështja e kultivimit të kanabisit është çrrënjosur një herë e mirë në Shqipëri. I pyetur nga gazetari Qafoku nëse ishte i vërtetë informacioni se ishin zbuluar parcela kanabisi në Përmet dhe Vlorë, ministri e mohoi. Sipas tij, janë zbuluar disa parcela të vogla por ky nuk është rikthim.
Është e vërtetë që ditët e fundit janë zbuluar dy parcela me kanabis në Përmet dhe në Vlorë?
“Nuk kam dijeni, sigurisht që ka rëndom, ka raste që policia kap sasira të vogla, ka gjithmonë në ulje. Ky vit ka shënuar ulje akoma të rëndësishme. Duhet të keni parasysh që kanabis në sasi të vogla kultivohet edhe në Londër. Nuk është fjala që këtu e kemi zeruar ne çdo tentativë kultivimi por e kemi ulur. Raste sporadike ka, sigurisht që ka dhe përpjekja e Policisë së Shtetit për ta kontrolluar territorin në mënyrë rigoroze dhe për të goditur çdo rast vazhdon edhe sot. Tentativat tani janë të izoluara, në sipërfaqe shumë të vogla dhe në territore shumë të largëta. Kjo tregon se mbijetesa e këtij fenomeni në Shqipëri tashmë është e pamundur.”
