Florian Wirtz zgjodhi Liverpool, kështu që Bayern duhet të veprojë shpejt për të gjetur një sulmues të majtë. Klubi bavarez ka disa pista në lojë dhe ende nuk ka marrë një vendim final se cili është profili i duhur për skuadrën.
I pari për momentin renditet Nico Williams. Ylli i Bilbaos ka klauzolë 58 mln euro. Real Madrid dhe Arsenal kanë shfaqur interes për të. Kjo e bën të vështirë betejën e Bayern, sepse nuk është klub aq joshës për spanjollin, sidomos përballë Los Blancos.
I dyti në radhën e objektivave të Bayern është Raphinha. Ylli i Barcelonës ka kohë që ndiqet nga klubi bavarez. Ai kushton mbi 70 mln euro, shifër që nuk i tremb kampionët e Gjermanisë. Problemi është se ai nuk ka ndërmend të largohet nga Barcelona.
I treti nga emrat e përmendur në Mynih është Eberechi Eze. Ai luan te Crystal Palace dhe kushton rreth 55 mln euro. Ka disa ditë që flitet se Bayern po e ndjek këtë lojtar. Ai luan si trekuartist dhe si sulmues i majtë.
Emri i katërt është Kaoru Mitoma. 28-vjeçari luan te Brighton dhe vlerësohet rreth 50 mln euro. Bayern e pëlqen shumë profilin e tij.
I pesti, por jo më pak i kërkuari, është ylli i Milanit, Rafael Leao. Portugezi kushton rreth 75 mln euro. Për të kanë interes edhe Barcelona dhe disa klube angleze. Problemi i tij është mungesa e qëndrueshmërisë. Bayern “trembet” nga lojtarë të tillë. m.p.
