Vetëm një ditë pas përfundimit të afatit që banorët e prekur nga tërmeti të largoheshin nga hotelet ku ishin akomoduar, autoritetet vendore dhe qendrore janë tërhequr nga vendimi për t’i larguar prej tyre.
Pas datës 3 janar këta banorë supozohej që të akomodoheshin në banesa me qira të cilat do subvencionoheshin nga shteti. Duke qenë se jo të gjithë kanë gjetur banesat me qira, vendimi për qëndrimin e tyre në hotel është shtyrë.
Ditë më parë banorët të përkrahur nga Partia Demokratike, janë shprehur se do nisnin një grevë urie për të kundërshtuar vendimin e qeverisë. Nga 1000 banorë që ndodhen në hotele në Shëngjin, 120 prej tyre që kanë plotësuar procedurat u ishte kërkuar që nesër të dilnin, por ata kanë bërë rezistencë duke mos pranuar.
Përballë kësaj situate, kryetari i Bashkisë së Krujës, Artur Bushi, sipas banorëve ka qenë mbrëmë në hotel ku janë vendosur në Shëngjin duke u garantuar se do të vijojnë që të qëndrojnë deri kur të gjejnë shtëpitë me qira.
Qiraja e miratuar nga bashkia është 3 mijë lekë për person në muaj. Ata i kanë kërkuar kryetarit të bashkisë që të rishikojë vendimin, ndërsa kanë marrë miratimin e tij. Përpos çmimit problem është edhe gjetja e shtëpive me qira./Fjala.al
