Ndërsa në Angli tifozët dhe futbollistët e Premier League janë ende duke pritur për një datë zyrtare për t’u rikthyer në fushë dhe 12 qershori mendohet si optimale, klubet tashmë kanë filluar të punojnë për sezonin e ardhshëm, pavarësisht pasigurisë që lidhet me pandeminë e koronavirusit. Këtë sezon sigurisht që do të luhet pa tifozë dhe me dyer të mbyllura, por në të ardhmen tifozët do të jenë në gjendje të kthehen në stadiume.
Risia nga ishulli vjen me mënyrën sesi britanikët po organizohen vetë duke menduar për disa zgjidhje alternative siç është shorti.
Përgjegjësi mjekësor i Premier League, Mark Gillett dha edhe detaje: “Situata nuk do të përmirësohet shumë në 6 ose 12 muajt e ardhshëm nga pandemia e Covid-19”. Ai sqaroi se se ose do të luhet vazhdimisht pa tifozë edhe në sezonin e ardhshëm, ose klubet do të duhet të sigurojnë një kapacitet shumë të kufizuar që impiantet e tyre të përputhen me rregullin e distancimit shoqëror. Por mbetet pikëpyetja se kujt do ti shkonin biletat dhe “pass” e sponsorëve për të parë ndeshjet. Këtu hyn në skenë ideja e lotarisë.
Sipas mediave angleze, në lotarinë për të parë ndeshjet do synohet te ata që kanë abonime të vlefshme për këtë sezon, e do konsiderohen të parët edhe për sezonin e ardhshëm. Por çfarë do të ndodhte nëse futbolli detyrohej të luhej pa tifozë deri në vitin 2021? Ndoshta për klubet angleze është më mirë të mendojnë së pari se si të kompensojnë abonentët e sezonit 2019/20, para se ti shtojnë me një faturë të re…
