Ka përfunduar mbledhja e Këshillit Politik ku diskutohet për reformën zgjedhore. Palët nuk kanë arritur asnjë marrëveshje sa i përket futjes së teknologjisë në zgjedhje.
Gjiknuri akuzoi demokratët se nuk kanë të qartë në atë se çfarë kërkojnë, por Bylykbashi deklaroi pas tij se PD kërkon qartësisht teknologjinë në zgjedhje: identifikim, votim dhe numërim elektronik të votave.
Ndërkohë, sa i përket kërkesës së opozitës jashtëparlamentare që çështjet zgjedhore të trajtohen nga Gjykata Kushtetuese, Gjiknuri tha se Partia Socialiste do të marrë kohë për të parë edhe ndryshimet ligjore.
Në lidhje me ndryshimin e sistemit zgjedhor, një kërkesë e vazhdueshme e opozitës parlamentare dhe shoqërisë civile, Gjiknuri theksoi se nga PD dhe LSI nuk ka ende asnjë propozim.
