Deputetja e Partisë Socialiste, Mimi Kodheli u përball së fundmi me një furi kritikash për shkak të deklaratës që bëri ndaj mësueseve në Shqipëri. Referuar rastit të përdhunimit të 15 vjeçares në Tiranë, Kodheli akuzoi mësueset se nuk janë më të fokusuara te nxënësit, por ia kushtojnë kohën lyerjes së flokëve, syve dhe buzëve.
“Dikur ne mësuesit i konsideronim si prindërit tanë të dytë, të ka marrë në telefon prindi, të paktën unë i takoj asaj gjenerate, dhe mësuesja merrte në telefon dhe thoshte se pse ka munguar fëmija. Por sot zysha tona e kanë mendjen për të bërë të tjera punë, nuk të del koha të jesh edhe zyshë të bësh ditarin tërë ditën, të lysh edhe flokët, sytë buzët, vetulla me funde e minifunde. Zysha tona kanë qenë të pamartuara dikur por sot s’merret vesh se kush është bërë zyshë. Do ta marrim këtë situatë në dorë apo do flasim”, ka thënë Kodheli.
Por kjo deklaratë e ish-ministres së Mbrojtjes nuk gjendet më në faqen e Parlamentit. Deklarata është fshirë dhe video është ripublikuar sërish pa Mimi Kodhelin.
