Sipas sistemit ALERT të survejancës, në Shqipëri, sikundër në të gjithë vendet Europiane po qarkullon 4 lloje virusesh. 2 nëntipe te tipit A dhe dy të tipit B por me dendur haset virusi AH1N1.
Padyshim, ulja e ndjeshme e temperaturave ka shtuar problemet shëndetësore dhe viruset në qarkullim. I ftohti, tipik për stinën në të cilën ndodhemi, ka ndikuar në uljen e imunitetit e për pasojë edhe në prekjen nga infeksionet. 11.500 raste rezultojnë të prekur çdo javë nga ky virus ndërsa numri pritet të rritet në ditët në vijim.
Specialistët e shëndetit publik thonë se deri tani nuk ka raste të rënda por gripi është një sëmundje e paparashikuar dhe duhet marrë seriozisht.
Mjekja infeksioniste Migena Qato, e ftuar në emisionin “Mirëmëngjes Shqipëri”, tha se gripi është një ngjarje epidemilogjike e pritshme dhe përvitshme por për momentin numri i rasteve me simptoma grip-ngjasues është në rritje.
Mjekja sugjeron vaksinimin për grupet në risk si fëmijët dhe të moshuarit. Ajo thotë se në ambientet e mjekëve, mbulimi vaksinal ka qenë i plotë dhe se asnjëherë nuk është vonë për të.
Ndonëse në spitale ende nuk ka një qarkullim të shtuar të virusit, përsëri shumë paciente i drejtohen Urgjencës së spitalit Infektiv ose atij të Sanatoriumit edhe për simptoma të menaxhueshme nga qendrat shëndetësore. Në këto rrethana, nisur edhe nga eksperiencat e viteve më parë, ku mbingarkesa në spitale bëhej pengesë për trajtimin e rasteve të rënda, ministrja e Shëndetësisë u ka bërë apel prindërve të përdorin qendrat shëndetësore për fëmijët e tyre duke komunikuar se tre prej tyre janë 24 orë hapur në 7 ditët e javës.
