Policia e Shtetit ka dhënë informacionin zyrtar lidhur me arrestimin e Viktor Markut, ditën e sotme në Malin e Zi.
Sipas burimeve zyrtare ai po qendronte në mënyrë të parregullt në shtetin fqinj dhe falë shkëmbimit të informacioneve mes dy palëve të autoritetetve policore, është bërë e mundur lokalizimi dhe kapja e tij. Ai iu është dorëzuar policisë shqiptare në Pikën Kufitare të Hanit të Hotit.
Viktor Marku është vëllai i Prel Markut të ekzekutuar nga Hektor Billa në vitin 2006 në Angli dhe ngjarja e 11 qershorit dyshohet se ka ndodhur për hakmarrje. Ndërkohë një ditë më parë u vu në pranga nipi i Prel Markut, 22-vjeçari Sebastian Mali i cili akuzohet si bashkëpuntor për ngjarjen në fjalë.
Njoftimi i policisë
Arrestohet autori kryesor i dyshuar për vrasjen e shtetasit H. B.
Falë shkëmbimit të informacioneve dhe bashkëpunimit efikas me Policinë malazeze u bë i mundur lokalizimi, kapja dhe arrestimi i shtetasit V. M.
Strukturat e Policisë së Shtetit kanë vënë në pranga, në Pikën e Kalimit Kufitar Hani i Hotit Shkodër, shtetasin V. M., pasi dyshohet se është autori kryesor i ngjarjes së ndodhur mbrëmjen e 11 qershorit, te Komuna e Parisit, Tiranë, ku mbeti i vrarë me armë zjarri shtetasi H. B.
Shtetasi V. M. qëndronte në mënyrë të parregullt në Malin e Zi dhe falë shkëmbimit të informacioneve mes Policisë së Shtetit dhe Policisë Malazeze, u bë i mundur lokalizimi dhe kapja e shtetasit V. M., në Malin e Zi.
Policia malazeze ia ka dorëzuar shtetasin V. M., strukturave të Policisë së Shtetit, në Pikën Kufitare të Hanit të Hotit.
Një ditë më parë, nga strukturat policore të DVP Tiranë u kap dhe u vu në pranga njëri nga bashkëpunëtorët në vrasje, 22-vjeçari S. M., nipi i shtetasit V. M.
Ndërkohë, nga Sektori Kundër Krimeve të Rënda në DVP Tiranë, në koordinim nga Departamenti i Policisë Kriminale dhe nën drejtimin e Prokurorisë së Rrethit Gjyqësor Tiranë, vijon puna intensive për zbardhjen dhe dokumentimin e plotë ligjor, identifikimin dhe kapjen e personave të tjerë të përfshirë në këtë vrasje.
Policia e Shtetit falënderon Policinë malazeze për bashkëpunimin, shkëmbimin e informacioneve dhe koordinimin e veprimeve, duke bërë të mundur vënien në pranga të autorit të vrasjes së shtetasit H. B.
/En.Br./Fjala.al
