Japonia ka për herë të parë superkompjuterin më të shpejtë në botë që po përdoret për të hulumtuar përhapjen dhe trajtimin e koronavirusit. Fugaku, i cili u zhvillua nga Fujitsu (FJTSF) dhe Instituti i Kërkimit Qeveritar Riken, u rendit i pari në listën top 500 të superkompjuterëve globalë.
Kjo listë është krijuar mbi standarde, si shpejtësia e përpunimit dhe performanca e informatikës së përdorur në inteligjencën artificiale. Fugaku mund të kryejë më shumë se 415 katrilion llogaritje në sekondë, duke e bërë atë 2,8 herë më shpejt se Summit, superkompjuteri i ndërtuar nga IBM, i cili më parë mbante vendin e parë. “Shpresojmë që teknologjia kryesore e zhvilluar për Fugaku-n të kontribuojë në përparime të mëdha në sfidat e vështira sociale si COVID-19”, tha Satoshi Matsuoka, drejtori i Qendrës Riken.
Superkompjuteri japonez po përdoret tashmë në baza eksperimentale për hulumtime në lidhje me COVID-19, përfshirë diagnostifikimin, terapinë dhe simulimet e përhapjes së virusit. Fugaku – që është një emër tjetër për malin Fuji – është planifikuar të funksionojë me kapacitet të plotë vitin e ardhshëm. Përpos superkompjuterëve Summit dhe Fugaku, Sierra është një sistem i ndërtuar në Shtetet e Bashkuara që zë vendin e tretë, dhe Sunway TaihuLight dhe Tianhe 2A janë dy superkompjuterë të tjerë të zhvilluar nga institutet kineze të kërkimit kombëtar.
/En.Br./Fjala.al
