Vetëm një ditë më parë, lideri suprem i Iranit Ali Khamenei na kërcënoi dhe për këtë ngjarje reaguan të gjitha institucionet shqiptare.
Përveç deklaratave të drejtuesve të shtetit, janë ndërmarrë dhe masa konkrete pë të rritur sigurinë e muxhahedinëve të strehuar në Shqipëri.
Është shtuar vigjilenca dhe siguria përreth kampit ku strehohen anëtarët e MEK, në Manëz. Numri i rojeve private është rritur, si dhe patrulla të policisë qëndrojnë aty 24 orë.
Gjithsesi, kampi i muxhahedinëve duket i qetë. Banorët e kampit pohojnë se po ndjekin shpresëplotë zhvillimet në Iran.
Drejtori i zyrës së shtypit të MEK e përshëndet vrasjen e gjeneralit Qasem Soleimani më 3 Janar.
“Ai ishte një nga kriminelët më të mëdhenj të kohës sonë dhe besoj se ajo çfarë ndodhi është mirëpritur nga njerëzit e Iranit dhe të rajonit”, thotë Shahriar Kia.
“Ishte sulm ndaj terrorizmit, kjo është pozitive. Ne gjithmonë kemi shpresë për të ardhmen e Iranit. Shqipëria nuk është e përjashtuar nga vendet e tjera prej sulmeve terroriste. Por jo në mënyrë specifike, pra nuk mendoj se ka ndonjë rrezik konkret për Shqipërinë”.
Prej 6 vitesh në kampin e Manzës janë të strehuar rreth 3000 muxhahedinë, kundërshtarë të regjimit të ajatollahëve në Iran.
Në Shqipëri ndjehen të sigurt, por regjimi i Iranit mbetet për ta një rrezik.
“Ne kemi qenë gjithmonë të kërcënuar nga regjimi iranian jo vetëm në Shqipëri, dhe për sa kohë regjimi iranian vazhdon aktivitetin e tij terrorist, kërcënimet do të jenë gjithmonë të pranishme”.
E përjashton faktin se Shqipëria mund të kërcënohet nga Irani. /Fjala.al
