Lëvizja Vetëvendosje po proteston kundër vizitës së presidentit serb, Aleksandër Vuçiç duke e cilësuar atë si një kriminel lufte.
Sipas Vetëvendosjes, Shqipëria nuk mund të pranojë një kriminel lufte për vizitë që vjen të pozojë si bamirës me bekimin e kryeministrit Edi Rama.
Me thirrjet “Turp! Jashtë nga Shqipëria”, protestuesit kanë theksuar se minishengeni i shërben vetëm Serbisë dhe askujt tjetër.
Dhe në këtë rast Edi Rama po bëhet palët me kriminelët e luftës dhe po anashkalon krejt Kosovën.
Aktivistët e shumtë të mbledhur te lulishtja në krah të Presidencës, kanë kërkuar largimin e presidentit Vuçiç. Ndërsa e kanë cilësuar Ramën një tradhtar të kombit shqiptar.
Për të menaxhuar protestën në rrugë ndodhen edhe forca të shumta policore, të cilat fillimisht janë përplasur me protestuesit, teksa i kanë spostuar këta të fundit nga trotuari përballë hotel “Rogner”, aty ku Rama po zhvillon takimin e parë me Vuçiç dhe Zaev.
