Tërmeti i 26 nëntorit i ka kushtuar 140 pallate të pabanuara kryeqytetit. Megjithatë sipas drejtorit të përgjithshëm i Emergjencave Civile në Bashkinë e Tiranës, Erindi Bejko, do të duhet dhe një akt ekspertimi i thelluar për të vlerësuar se cilat nga pallatet do të rikonstruktohet dhe cilat do të prishen tërësisht.
“Kanë mbërritur aktet e para të konstatimit zyrtarisht. Për sa i përket dëmeve në pallat janë ndarë në tre kategori.
Për ato që kemi vërtetim që nuk kanë dëme në strukturë kemi filluar proces evidentimi për nevojat dhe riparimet.
Dëmet e mesme do të marrin një sy të specializuar dhe pastaj do të nisin nga riparimi.
Për ato me dëmtime të rënda do të vendoset nëse pallatet do të rrinë në këmbë apo do të shemben”, – deklaroi gjatë një prononcimi për Tv Klan, drejtori i përgjithshëm i Emergjencave Civile në Bashkinë e Tiranës, Erindi Bejko.
Pas mbylljes së raporteve përfundimtare, Bashkia e Tiranës thotë se do të nisë puna për riparimet e dëmeve të lehta në objektet që nuk kanë pësuar dëmtime në strukturë.
Ndërkohë ekspertët në Durrës, Krujë, Lezhë dhe Laç vijojnë vlerësimin e banesave të prekura nga tërmeti. Disa prej tyre që janë vlerësuar të pabanueshme janë shembur dhe të tjera po vijojnë që të kenë të njëjtin fat./Fjala.al/
