Policia e Tiranës arreston në flagrancë, në Aeroportin e Rinasit, një vajzë 23 vjeçe me një kartë italiane të falsifikuar. Gjithashtu në pranga ka rënë edhe punonjësi i aeroportit për favorizim.
Mësohet se 23-vjeçarja Xh.K, banuese në Mat ka dashur që të shfrytëzojë ditët e para të vitit të ri duke shpresuar se kontrolli do të ishte më i ulët.
Madje në ndihmë të saj ka qenë edhe një punonjës i sigurisë te kontrolli i pasagjerëve me skaner në aeroport, i cili u arrestuar nga policia nën akuzën e “Ndihmë për kalim të paligjshëm të kufirit” dhe “Falsifikim i letërnjoftimeve, pasaportave ose i vizave”.
Bëhet e ditur se 43-vjeçari ka qenë i proceduar më parë nga Policia Kufitare, pasi është kapur në zonën sterile me 2700 euro dhe telefon celular.
Nga të dhënat e policisë mësohet se XH. K. po kalonte në drejtim të Italisë me dokumentacion e saj të rregullt. Por, pas dyshimeve të punonjësve të Policisë Kufitare mbi qëllimin e udhëtimit dhe arsyet e dhëna, është kaluar në vijën e dytë për kontroll të imtësishëm, ku i është gjetur një kartë italiane e falsifikuar.
Në bashkëpunim me specialistët për hetimin e trafiqeve të paligjshme në DVP Tiranë u organizua puna dhe pas hetimeve të para hetimore rezultoi se:
Shtetasi R. K., punonjës i aeroportit të Rinasit në kontrollin me skaner, në bashkëpunim me persona të tjerë, pasi kishin siguruar paraprakisht dokumente të falsifikuara italiane me gjeneralitete italiane, kanë tentuar ta kalojnë nëpërmjet aeroportit të Rinasit tranzit drejt aeroportit të Romës, Milano, me destinacion final në Mbretërinë e Bashkuar, shtetasen Xh. K..
Vijon puna për identifikimin e bashkëpunëtorëve të tjerë të përfshirë në këtë veprimtari të paligjshme, pasi dyshohet se kanë pajisur edhe shtetas të tjerë me dokumente të falsifikuara, që do t’i ndihmonin për të kaluar në mënyrë të paligjshme drejt Britanisë së Madhe.
Materialet procedurale do t’i kalojnë Prokurorisë pranë Gjykatës së Shkallës së Parë Tiranë, për veprime të mëtejshme.
