Biblioteka Kombëtare duhet të kthehet në një institucion kërkimor – shkencor”. I këtij mendimi është Piro Misha, drejtori i këtij institucioni.
Por duket se 100 vjetori, Bibliotekën Kombëtare e gjen në ditët e saj më të këqija me mungesë të plotë hapësirash. Zgjidhja e këtij ngërçi sipas drejtorit Piro Misha, vjen me ndërtimin e bibliotekës së re, e cila pritet të nisë këtë vit.
Drejtori i Bibliotekës Kombëtare Piro Misha në një intervistë televizive thotë se nisja e punimeve për godinën e re në këtë 100 vjetor është domosdoshmëri. Misha pranon se projekti është gati, por mungojnë fondet për zbatimin e tij. Ai thekson se për të pasur normalitet nevojiten 12 herë më shumë hapësira.
Festimet e 100 vjetorit sipas Mishës do të jenë të fokusuara në dy drejtime.
“Që të bëhet e dukshme pasuria e jashtëzakonshme që është këtu, duhet të bëhet e njohur nga publiku. Biblioteka të kthehet në një institucion kërkimor – shkencor”, u shpreh Misha.
Përgjatë gjithë vitit 2020 në Bibliotekën Kombëtare do të organizohen një sërë aktivitetesh si ekspozita dhe debate rreth problematikës së librit dhe sfidat në kohët moderne.
