Marrëveshja midis Serbisë dhe Kosovës për vendosjen e fluturimeve direkte mes dy vendeve është cilësuar një fitore e madhe nga presidenti amerikan Donald Trump.
Përmes një postimi në Twitter, Trump shkruan se: “Të gjithë thoshin se nuk bëhej dot. Por për herë të parë në një gjeneratë do të ketë fluturime të drejtpërdrejta midis Serbisë dhe Kosovës. Një tjetër fitore.”
Everyone said it couldn’t be done. But for the first time in a generation, there will be direct flights between Serbia and Kosovo. Another win. Thanks to @WHNSC Ambassador Robert O’Brien and Ambassador @RichardGrenell! pic.twitter.com/0qSLryG96B
— Donald J. Trump (@realDonaldTrump) January 21, 2020
Duke iu referuar kësaj marrëveshjeje, Trump falënderoi ambasadorin Robert O’Brien, këshilltarin i sigurisë kombëtare të Shtëpisë së Bardhë dhe ambasadorin e SHBA-ve në Gjermani, Richard Grenell.
Marrëveshja
Diplomatët amerikanë, ishin ata që ndërmjetësuan nënshkrimin e kësaj marrëveshjeje midis Kosovës dhe Serbisë për rihapjen e linjës ajrore Prishtinë-Beograd. Kjo është një përpjekje për përmirësimin e lidhjeve jo vetëm ekonomike, por edhe politike midis dy vendeve.
Marrëveshja u nënshkrua nga Milun Trivunac, sekretar shtetëror në ministrinë serbe të Ekonomisë dhe Eset Berisha drejtor i Autoritetit të Aviacionit Civil të Kosovës në ambasadën amerikane në Berlin.
Të pranishëm ishin ambasadori i SHBA në Berlin, Richard Grenell, i dërguar i posaçëm i presidentit Trump për bisedimet e paqes Kosovë – Serbi si dhe këshilltari për Siguri Kombëtare, Robert O’Brien./Fjala.al/
