Duke nisur nga dita e sotme policia shqiptare do të ketë në dispozicion poligrafët apo ato që njihen ndryshe makinat e së vërtetës. 5 poligrafët janë certifikuar në Ministrinë e Brendshme ku Shërbimi për Çështjet e Brendshme dhe Ankesat do të marrë në testim edhe kandidatët për Byronë Kombëtare të Hetimit.
Nga ana e saj, ambasadorja amerikane, Yuri Kim theksoi se ekspertët e poligrafit janë një tjetër armë në arsenalin e Shqipërisë për të luftuar korrupsionin.
“Jam shumë e kënaqur për të certifikuar suksesin e 5 studentëve. Instruktorja e tyre ka vlerësuar në mënyrë të përsëritur përkushtimin e tyre dhe disiplinën. Është një moment i rëndësishëm në jetën e të diplomuarve por edhe një moment i rëndësishëm në jetën e Shqipërisë. Shqipëria ka ligjin e ri, ligjin e SPAK që kërkon që të gjithë punonjësit e BKH t’i nënshtrohen poligrafit.
Ata janë një tjetër armë në arsenalin e Shqipërisë për të luftuar korrupsionin, një tjetër mundësi për të forcuar shtetin ligjor. Jemi këtu për të përuruar edhe njësinë e poligrafit në SHÇBA. Kjo njësi do fillojë të kryejë kontrollin e kandidatëve për drejtimin e BKH”, deklaroi ambasadorja Kim.
Yuri Kim shtoi se Shtetet e Bashkuara të Amerikës nuk do të ndalen këtu por do të vazhdojnë të japin ndihmën e tyre me mjete shtesë më luftën ndaj krimit të organizuar dhe korrupsionit
“SHBA-të qëndrojnë me qeverinë shqiptare për të larguar korrupsionin nga sistemi i drejtësisë penale. Dua t’iu them të diplomuarve ‘unë besoj tek ju’ dhe dua t’i them popullit shqiptar ‘unë besoj tek ju’”, tha Kim.
