Në tetorin e vitit të kaluar Hipoteka e Vlorës u përfshi nga një ngërç i madh që po pengon ecurinë normale të veprimtarisë së institucionit. Askush nuk e merrte përsipër institucionit pas skandalit me pronat në bregdet dhe aso kohe dorëhiqeshin krerët e emëruar apo të komanduar edhe brenda dy javësh. Kështu ndodhi pikërisht me ish-drejtoreshën Elona Hodaj, si edhe zëvendësin e saj, Krenar Xhemali.
Por përplasjet për atë skandal pronash vijoi edhe më pas derisa mësohet se ditën e sotme është bërë edhe emërimi i një tjetër personi që pretendohet se do të drejtojë zyrën e zhurmshme të Hipotekës së Vlorës.
Tashmë i është besuar Bilbil Alisë ky post. Sipas të dhënave bëhet me dije se Alia ka ardhur pas largimit të një të komanduari që gjendej në atë detyrë, ku edhe ai ka paraqitur dorëheqjen për të mos qenë më në atë post. Për këtë shkak është kërkuar që një person tjetër të emërohet, vetëm e vetëm që të shmanget kolapsi në të cilin është futur drejtoria.
Kadastra e Vlorës prej kohësh është parë si një zonë “lufte”, pasi dy grupe të ndryshme pretendojnë për pronësinë e të njëjtës pronë në zonën e Jalës. Gjykata e Vlorës ka dhënë një vendim të formës së prerë për marrjen e pronës nga njëri prej grupet. Ndërsa Kadastra e Vlorës ka kërkuar prej kohësh pezullimin e këtij vendimi duke favorizuar palën tjetër. Pak javë më parë, një grup pune i Krimit Ekonomik çoi për hetim 23 punonjës të këtij institucioni, pasi akuzohen se kanë tjetërsuar pronat. Menjëherë pas kësaj lëvizjeje, erdhi dorëheqja e nën-drejtorit të Kadastrës Ardian Mustës. n.k/Fjala.al/
