Historia e një studenteje shqiptare në Angli është thuajse historia e gjithë të diplomuarve që kërkojnë vendet e Europës të punësohen ose të fitojnë të drejta qëndrimi dhe punësimi atje ku shkojnë. Vajza vetëm 22 vjeç, për t`i ikur realitetit të hidhur në vendin tonë, ka zgjedhur dokumente false e pastaj është përpjekur të gënjejë vetëm e vetëm që të qëndrojë në Britani.
Avokati i saj ka zbuluar edhe qëllimin e studentes shqiptare që ka tentuar të kryente specializim në fushën e Infermierisë dhe të qëndrojë aty por fati i ka rezervuar një fund të hidhur kur ajo është ndaluar nga policia. Ajo nën akuzën e përdorimit të dokumenteve false është hetuar dhe gjykuar në shtetin britanik dhe tashmë do të vuajë dënimin e caktuar nga gjykata!
Historia
Një 22-vjeçare shqiptare është dënuar nga një gjykata në Britani me 13 muaj e gjysmë burgim për faktin se u kap me dokumente të falsifikuara. Ina Bufi, shkruajnë mediet britanike, u ndalua korrikun e vitit të kaluar nga policët e kufirit në portin e Holyhead. Ajo po udhëtonte me makinë kur agjentët i kërkuan dokumentet. Në atë moment ajo dorëzoi një kartë identiteti dhe një patentë greke ku ngulmonte se ishin origjinale. Në fund, Ina Bufi u dorëzua dhe pranoi se është qytetare shqiptare dhe nuk ka të drejtë hyrjeje në Britani të Madhe.
Makina ku ndodhej vajza drejtohej nga irlandezi Robert Marsland, i cili më parë kishte kaluar edhe 5 shqiptarë ilegalisht në Britani. Ky i fundit nuk mori pjesë në seancë për shkak të motit të papërshtatshëm për të udhëtuar. Ina Bufi u arrestua dhe akuzua për posedim të dokumenteve false.
Para gjykatës ajo tha se ishte viktimë e skllavërisë moderne dhe po trafikohej në Britani. Por hetimet kishin vërtetuar se Ina Bufi nuk ishte trafikuar, por kishte hyrë vetë në Angli me dokumente të falsifikuara. 22-vjeçarja pranoi akuzat e prokurorisë, ndërsa avokati i saj tha se ajo është infermiere e diplomuar në Shqipëri dhe kishte planifikuar të kryente studimet “Master”. Avokati bëri gjithashtu me dije se Ina ka bërë kërkesë për azil në Britani të Madhe.
Në fund gjykatësi dha dënimin me 13.5 muaj burgim për 22-vjeçaren shqiptare, si dhe urdhëroi konfiskimin e dokumenteve false greke që përdoreshin prej saj. Tashmë nuk i dihet se cili do të jetë fati i Inës kur të lërë qelinë nëse ajo do mundet dot ta fitojë të drejtën e shkollimit të dëshiruar. n.k /Fjala.al/
